DILI, STLTIMORLESTE.com – Meza no kadeira iha Eskola Sekundariu Jeral nu. 10 Dezembru Komoro sufisiente ba estudante sira.
Liafuan nee hatoo husi Diretor ESJ nu. 10 Dezembru Komoro, Manuel Verdial ba jornalista STL iha nia knaar fatin Komoro, Tersa (02/12/2025).
“Hau hanoin konaba meza no kadeira, bainhira laiha ita husu ba Ministeriu, maibe agora dadaun nee Eskola 10 de Dezembru nian meza no kadeira sufisiente hela ba ita nian estudantes sira, hodi bele uza ba iha prosesu ensinu aprendizajen. Nee duni ami laiha defikuldade ba meza no kadeira,” dehan nia.
Nia hatutan, hadia administrasaun no presiza hadia problema infraestrutura eskola nian, hanesan sala ba professores atu oinsa mak bele fo kondisaun neebe diak ba professores sira, hodi nunee bele prepara materia ho diak.
“Ami nian meza no kadeira sufisiente hela ba ami nian estudantes sira, bainhira menus maka ami sei halo pedidu ba ME, tanba meza no kadeira nee bele fasilita ita nian estudantes sira iha prosesu ensinu aprendizajen,” tenik nia.
Iha fatin seluk Diretor Diresaun Nasional Infransturtura no Edukativu iha ME, Helio Lopes antes nee dehan, kadeira no meza sufisiente ona para atu responde eskola sira neebe laiha kadeira no meza, inklui sala de aulas foun sira neebe konstrui, laiha kadeira no meza, presiza atu priense ba sala de aulas foun sira neebe konstrui, kadeira ho meza eskola barak eziste hela,falta de jestaun para kontrolu sasan sira nee.
“Tanba nee Ministeriu responde deit ida neebe laiha duni no ida neebe kondisaun aat ona tanba kadeira ho meza ita uza tempu kleur, ida neebe aat,ita presiza troka kadeira ho meza foun neebe iha, ida neebe diak kontinua utiliza husi estudantes sira, ida neebe mak sala de aulas foun,laiha kadeira no meza, tuir pedidu no verifikasaun husi Ministeriu, bazea ba dadus neebe mai husi eskola, Munisipiu, ekipa sei halo verifikasaun, depois mak ita halo distribuisaun,” nia afirma.
Jornalista: Jacinta Sequeira
Editora: Domingas Gomes
