BAUKAU, STLTIMORLESTE.com – Ministeriu Edukasaun (ME) fo treinamentu ba dirijente eskola sira iha Munisipiu Baukau, atu halao prevensaun no protesaun ba labarik sira ho halakon violensia bazeia ba jeneru, iha eskola sira.
Diretor Servisu Munisipal Edukasaun Baukau, Afonso dos Santos da Costa esplika, treinamentu nee nuudar kontinuasaun husi programa sira seluk neebe Ministeriu Edukasaun implementa ona atu kapasita dirijente eskola sira kompostu Diretor, Diretor Adjuntu no Koodenador Eskola husi eskola ensinu baziku too Sekundaria no tekniku vokasional sira iha Munisipiu Baukau, atu intende no halo prevensaun no protesaun ba labarik estudante sira no halakon violensia bazeia ba jeneru iha nivel eskola.
“Formasaun nee halao durante loron rua para sira atu respeita no halao ida nee iha sira ida idak nia eskola, tanba formasaun ida nee kapasita lideransa eskola sira, para iha informsaun koinhesementu atu akompanha profesores estudante sira iha ida idak nia eskola,” Afonso hateten ba STL, iha Vila Nova, Baukau, Kinta (04/12/2025).
Nia konsidera, treinamentu refere importante ba dirijente eskola sira hodi intende informasaun sira no halakon violensia hasoru labarik estudante sira iha nivel eskola, tanba iha regulamentus sira la autoriza ona profesores ida atu baku estudante no halo violensia seluk hasoru estudante.
Nia sublina, razaun profesores ida atu baku estudante tanba lei garante estudante sira nia direitu, hanesan profesores iha dever atu hanoin estudante sira maibe la liu husi baku.
“Ita nia lei hateten entaun ita halo divulgasaun ba dirijente eskola sira, tanba ita hotu hatene ita foin husik aan husi kolonilista sira anterior ,entaun ita adapta aan liu husi ukun aan ida nee esforsu hadook violensia husi labarik sira,” Afonso fundamenta.
Nia argumentu, treinamentu refere nuudar meius ida atu kontinua hadia dirijente eskola sira nia mentalidade, hodi eduka labarik estudante sira la ho violensia.
Koordenador eskola Sekundaria Jeral Dom Carlos Filipe Ximenes Belo, Carlos Ximenes Filipe agradese ba Ministeriu Edukasaun tanba nafatin iha komitmentu eleva dirijente eskola sira nia konhesimentu, kona-ba prevensaun no protesaun ba labarik estudante sira no halakon violensia bazeia ba jeneru iha nivel eskola.
“Agradese tebes ba Ministeriu Edukasaun servisu hamutuk ho Juridiku ba Sosiedade nian, liu husi dalan ida nee aumenta ami nia koinhesementu ami bele implementa iha ami nia eskola ida idak. Treinamentu nee kona-ba prevene violensia domestika bazeia ba jeneru atu labele akontese iha ami nia eskola, tanba nee mak treinamentu ida nee nia benefisiu mos diak ba ami nuudar manorin,” Carlos komenta.
Koordenador eskola nee konsidera, treinamentu refere importante ba dirijente eskola sira, tanba nee sei aplika prevene violensia domestika bazeia ba jeneru, iha nivel eskola no kompromete sei intrudus ba profesores sira iha nivel eskola. inklui ba komunidade sira iha area Postu Administrativu Kelikai Antigu.
Entretantu total dirijente eskola neebe partisipa iha treinamentu refere hamutuk nain 50 resin husi eskola publiku Ensinu Baziku 17 no Sekundaria Jeral no Filial, inklui Tekniku Vokasional hamutuk 28 neebe eziste iha Munisipiu Baukau.
Jornalista: Tomas Reis
Editora: Carme Ximenes
