DILI, STLTIMORLESTE.com – Profesores nain 15 husi eskola sira iha Munisipiu Bobonaro la ativu hanorin estudante sira iha eskola, tanba kondisaun moras.
Informasaun nee hatoo husi Diretor Servisu Edukasaun Munisipiu Bobonaro, Miguel Freitas ba STL liu husi telefone, Kinta (04/12/2025).
“Ita nian professores neebe ho kondisaun moras la ativu hanorin estudantes iha eskola nee 14, maibe aumenta ida tan hamutuk 15. Sira nee la ativu hanorin ona, tanba struk. Sira 14 nee tinan barak mak la ativu ona, no ida seluk nee foin dadaun nee mak moras. Nee sira nain 15 nee lista ami submete ona ba iha parte nasional, ita nian professores sira nee hanorin iha nivel ensinu baziku,” nia deklara.
Miguel dehan, profesores sira nee barak mak struk no balun moras diabetes. Sira nain hira neebe mensiona nee tinan barak nian laran sira la hanorin estudantes iha eskola, tanba ho kondisaun moras.
Nunee mos Diretor Nasional Rekursu Umanu iha ME, João Amaral hatete, sira seidauk fo esplikasaun konaba lalaok moras prelongada ninia. Moras nee presiza hatama dokumentus saida, sekarik reforma ho moras prelongada ninia iha grau I, II no III.
“Lolos iha Dili nee 50, maibe tanba balun tama ona iha reforma obrigatoriu ninia, entaun hela deit maka 30. Ami hamutuk ho KFP no INSS seidauk fo esplikasaun ba sira, tanba ami sei okupadu hela ho submete dokumentus husi ita nian bolsa kandidatu professores nivel sekundariu no tekniku vokasional ninia. Sira nian dokumentus nee ami informa ba Munisipiu sira, bele submete dadaun depois mak ita halo esplikasaun,” nia afirma.
Jornalista: Jacinta Sequeira
Editora: Domingas Gomes
