DILI, STLTIMORLESTE.com – Prezidente Republika (PR), Jose Ramos Horta halo abertura ba ezebisaun no selebra tempu Natal.
Ohin (06/12/2025) Prezidente Republika Jose Ramos Horta halao abertura ba ezibisaun prezepiu hodi kontinua tradisaun Natal neebe apresiada iha nasaun, iha Palasiu Prezidensial Nicolau Lobato.
Eventu ida nee hola parte iha Programa Natal ba povu nuudar inisiativa Prezidente Republika realiza kada tinan.
Ezibisaun aprezenta prezepiu hamutuk 90 neebe hahu kria husi loron 18 Novembru too loron 3 Dezembru, fahe ba parte rua mak prezepiu hamutuk 21 iha kategoria ba labarik sira (tinan 16 ba kraik) no 69 iha kategoria ba ema boot sira.
Ezibisaun prezepiu sira nee fo enfaze ba responsabilidade ambiental liu husi utilizasaun material organiku, tradisional no resiklajen.
Prezidente dehan, prezepiu nuudar tradisaun riku neebe metin ona iha fiar sarani kristaun nian. Kriasaun prezepiu sira sai hanesan espresaun klean ida ba ita nia fiar, kriatividade no espíritu komunitariu.
“Ho haksolok hau abertura konkursu prezepiu neebe halo husi ita nia oan no joven sira. Ezibisaun prezepiu nee laos deit konkursu, ida nee oportunidade ida atu hametin ita nia ligasaun nuudar komunidade, hodi hatutan ita nia tradisaun sira ba jerasaun foun, no atu hatudu talentu artístiku no devosaun espiritual husi ita nia povu,” dehan PR Horta.
Ezibisaun abertura iha loron 06 Dezembru tinan 2025, too loron 09 Janeiru tinan 2026, ho manan nain sira sei anunsia iha loron enseramentu nian. Manan nain sanulu husi kada kategoria sei simu sertifikadu no premiu osan, enkuantu partisipante sira neebe la manan sei simu mos apresiasaun.
Festividade sira sei kulmina iha selebrasaun Natal ba povu iha Palasiu Prezidensial Nicolau Lobato iha loron 20 Dezembru tinan 2025, iha neebe Prezidensia Republika sei fahe parseiru Natal nian ba membru komunidade hamutuk 5000 inklui labarik sira, feto faluk, Orfanatu no ema sira ho nesesidade espesial.
Jornalista: Emerenciana Pinto
Editor: Xisto Mendonça
