DILI, STLTIMORLESTE.com – Governu iha responsabilidade tomak buka tuir restu mortais saudozu sira nian, neebe too oras nee seidauk hetan.
Diretor Ezekutivu CNC, Hugo Maria Fernandes dehan, maske Timor Leste selebra tinan 50 proklamasaun Unilateral maibe too oras nee Saudozu Nicolau Lobato no Saudozu seluk nia ruin seidauk hetan, ida nee responsablidade husi Governu hodi buka tuir nunee halot ho dignu.
“Governu nia responsablidade laos deit Governu Estadu nia responsablidade atu buka tuir ema sira neebe mak lakon, ida nee hakarak ka lakohi iha kontekstu direitus humanus lei internasional hatete, ema neebe lakon durante funu tanba konflitu politiko nee responsablidade primeiru mak ema neebe halo sira lakon maibe se sira labele responsabliza estadu ida nee tenke assume responsablidade,” dehan Diretur nee ba jornalista iha salaun CNC, Domingu (07/12/2025).
Diretur nee dehan, estadu Republika Demokratika Timor Leste tenke assume responsablidade halo esforsu hodi buka tuir restu mortais ba saudozu sira neebe too oras nee seidauk hetan.
Nia hatete, dia 7 Dezembru loron neebe importante hodi ezije ukun nain sira hodi buka tuir restu mortais saudozu sira nia neebe too oras nee seidauk hetan.
Nunee mos eis Prizioneira Politika, Josefa Adao da Silva husu Governu no estuda buka tuir Saudozu sira nia ruin neebe oras nee seidauk hetan nunee familia bele halot ho dignu.
“Rekomenda ba Governu atu haree ba militar sira neebe fo sira nia isin tomak ba rai ida nee, neebe ohin loron soe isin lemo lemo iha fatin lemo, tanba mate iha neebe deit ita lahatene tanba nee husu buka tuir,” katak nia.
Jornalista: Emerenciana Pinto
Editora: Domingas Gomes
