BAUCAU, STLTIMORLESTE.com – Jogador na’in haat (4) husi ekipa FC Udap hetan kanek hafoin akontese dezentendimentu entre jogador no adeptu sira durante disputa Kopa PAM Baucau kontra ekipa FC Salale, iha loron 07 Novembru 2026.
Treinador ekipa FC Udap, Ruben da Silva, relata katak insidente ne’e akontese iha jogu segunda parte, depois primeira parte remata ho rezultadu 0-0. Iha segunda parte, FC Udap konsege marka golu ida no falta minutu lima atu remata jogu, mosu dezentendimentu entre jogador sira iha kampu laran ne’ebé ikusmai kauza konfrontu.
“Dezentendimentu ne’e hahú entre jogador, maibé espetadór sira mós tama hotu. Husi ami nia ekipa, jogador na’in haat mak hetan kanek todan, tanba sira baku ho kadeira no ai-papan. Jogador balu mós hetan sama ho sapatu,” Ruben da Silva hateten ba STL liuhusi telefone, Segunda (09/11/2026).
Nia esplika katak jogador na’in haat ne’ebé hetan kanek sofre kanek iha parte matan, oin, ulun, kotuk, kabun no hasan tanba hetan baku husi adeptu sira.
Ruben fundamenta katak, hafoin insidente ne’e akontese, komisaun organizadora la deside atu kontinua jogu. Nune’e, ekipa FC Udap lori vítima na’in haat ba Hospital Rejionál Eduardo Ximenes (HoREX), Baucau, atu hetan tratamentu médiku.
Aleinde ne’e, ekipa mós aprezenta kazu refere ba Komandu Polísia Munisípiu Baucau atu buka solusaun, tanba tuir nia, durante konfrontu ne’e la iha forsa seguransa ne’ebé disponivel atu kontrola situasaun.
“Ne’e Kopa boot, tenke iha seguransa. Tanba ne’e kopa ba Munisípiu Baucau tomak, se mosu dezentendimentu hanesan ne’e, komisaun ka polísia tenke atua. Tanba ne’e, ha’u husu komisaun atu koopera ho forsa seguransa hodi asegura kompetisaun ne’e,” Ruben rekomenda.
Iha parte seluk, treinador FC Udap ne’e hateten katak ekipa nia golu ida ne’ebé marka hasoru FC Salale permite ekipa hakat ba faze 16 avos-de-final. Maibé, tanba insidente ne’ebé akontese, to’o agora ekipa seidauk hetan informasaun ofisiál husi komisaun organizadora kona-ba kontinua ka lae kompetisaun.
“Agora ami mós seidauk hatene se ami sei kontinua joga ka lae. Ami hein de’it desizaun husi komisaun, maibé sira seidauk telefone. Iha polísia, komandante sira informa katak vítima sira sei ajuda atu buka ema suspeitu, no depois hetan mak sira sei telefone fali ami atu rezolve problema ne’e. Maibé, to’o agora seidauk iha kontaktu,” nia hateten
(tom)
