LIKISA, STLTIMORLESTE.com – Timor Leste (TL) hetan ukun rasik aan (URA), tanba eroi sira ou luta nain sira tempu neeba hatudu unidade iha asaun, hodi lori rai nee ba hetan independensia.
Kestaun nee hatoo husi Padre selebrante Padre Sebastião Eugenio da Cruz Correia liu husi nia omilia iha selebrasaun misa tinan 50 neebe organiza husi Prezidensia Republika ho autoridade lokal iha Likisa, Loes, Sabadu (06/12/2025).
Padre selebrante nee agradese ba parte hotu neebe hamutuk selebra misa, hodi hanoin konaba passado invazaun nia ba tinan 50, nunee ohin selebra eukaristia ida nee hodi hanoin hikas tempu passado, tempu ida neebe nakonu ho matawen nakonu ho ran, ran sira neebe naklekar, ruin sira neebe naklekar iha fatin fatin.
“Tempu neeba hanorin no fo hanoin ba ita konaba luta nain sira nia luta sira fakar, mate tanba rai ida nee, hanoin konaba sira, no iha ita nia tempu uku naan ida nee ita bele dehan hanoin fali unidade neebe sira iha,” dehan Padre.
Padre hatete, ema neebe sei moris nee hanesan kontinuador deit hodi hametin unidade neebe uluk sira iha, unidade neebe brani halo sira fo aan ba mate brani atu fakar ran, balun sei moris hela hatene hela istoria 7 Dezembru nia, balun hatene tanba tempu neeba boot no balun kiik mais hatene.
“Tema unidade mak garantia ba sustentablidade nasaun nee nia, ita bele dehan, los duni uluk unidade mak halo ita garante ukun rasik aan, laiha unidade ukun rasik aan lamai, kuandu ita haree ba passado ita mos hakarak moris iha futuru ida neebe laiha tan passado ida uluk nia, passado hanorin ita atu luta ba futuru ida neebe diak ba sustentablidade nasaun nee nia tanba nee maluk sarani no ukun nain sira sivil no militar sira ohin maromak nia liafuan iha segudu domingo tempu adventu nia iha evanjelho jesus kristu haktuir Saun Mateus bainhira ema barak hakbesik ba nia atu simu batizmu João Batista dehan, tenke hakribi imi sala hodi fila ba diak pasa reinu lalehan besik too ona,” dehan Padre nee.
Padre hatutan, João Batista nia liafuan nee konvida ema hotu atu hakribi hahalok uluk la unidade nia hodi fila fali diak hodi halo diak ba rai ida nee no ba povu ida nee.
“Hakribi buat odi malu nia vigansa nia, ita tenke hakribi passado neebe ladiak ita tenke hakoi hamutuk tanba oras nee ita tama ona tinan 50 invazaun nia ita tenke brani atu husik, idade karik ita haree invazaun nee idade katuas nia ona tama ona idade katuas ita tenke haluha ona, ita tenke hanoin ba oin hodi hamoris hikas unidade hakribi buat neebe lahalo ita unidade tanba nee ita tenke hakribi,” dehan nia.
Padre nee hatutan, presiza hakiak unidade ida neebe atu lori nasaun nee ba oin ba progresu dezenvolvimentu ba futuru ida neebe nabilan.
Iha loron importante Prezidensia Republika hamutuk ho Autoridade husi Loes realiza seminariu siklu refleksaun ba tinan 50 invazaun Timor-Leste, ho tema Unidade Nasional Maka Garantiza Sustentabilidade Estadu no Nasaun.
Iha loron 6 fulan Dezembru halao programa hanesan kuda ai-oan, misa agradesimentu hodi hanoin hikas heroi nasional sira, inklui halai taru, kompetisaun dada tali, halai karon, loke ofisiál feira komunitaria, animasaun no konsertu musika.
Nunee mos iha loron 7 Dezembru iha seminariu no lansamentu no inisiativa sosial no halao seminariu siklu refleksaun, reuni veteranus, autoridade lokal, akademiku, representantís sosiadade sivil, membru korpu diplomatiku no komunidade. Seminariu fo atensaun ba unidade nasional hanesan fundu atu garante sustentabilidade estadu no nasaun, hametin memoria istorika no koesaun sosial.
Programa loron 7 inklui mos distribuisaun kabaz natal ba família neebe presiza, entrega premiu ba manan nain sira husi atividade komunitaria, Haree filmu dokumentariu kona-ba tinan 1975, Konsertu no animasaun kultural.
Atividade loron rua nee objetivu atu hametin memoria istoriku, promove partisipasaun komunidade no reafirma kompromisiu kolektivu ho dame, dezenvolvimentu no unidade nasional.
Jornalista: Emerenciana Pinto
Editora: Domingas Gomes
