DILI, STLTIMORLESTE.com – Freedom Faithnet Global (FFG) neebe lidera husi Maria Carlos (Mami) servisu hamutuk ho Cruz Vermelha Timor Leste (CVTL) no Banco de Sangue Hospital Nasional Guido Valadares (HNGV) Dili, realiza asaun doasaun raan hodi ajuda ema seluk neebe presiza raan.
Atividade asaun doasaun raan neebe mobiliza ema nain 151 husi nasaun Timor Leste no Indonezia halao iha Timor Plaza, Dili, Domingu (7/12/2025).
Koordenador FFG iha Timor Leste, Maria Carlos ba jornalista hatete katak FFG hamutuk ho CVTL no Banco de Sangue HNGV Dili realiza asaun doasaun raan ba dala tolu iha tinan 2025.
“Atividade asaun doasaun raan neebe ami realiza ohin loron nee hanesan atividade umanitaria neebe ami halo ba dala tolu iha tinan ida nee nia laran. Atividade dosaun raan nee ami halo kada fulan tolu ka fulan haat dala ida no ema barak mak voluntariumente oferese sira nia ran ba ema neebe presiza,” dehan Maria Carlos.
Nia dehan, ema neebe voluntariamente oferese nia ran liuhosi asaun doasaun raan nee la hatene nia raan nee ba se, maibe raan turuk ida ajuda salva ema seluk nia moris. Nunee mos raan sira neebe kolleta husi mobilizasaun FFG servisu hamutuk ho CVTL no Banco de Sangue HNGV Dili nee, bele ajuda fali mos doador sira nia familia. Tanba nee, nia husu ba ema hotu atu halo doasaun raan voluntariamente hodi bele ajuda ka salva ema seluk nia vida iha ospital.
Maria Carlos dehan, atividade asaun doasaun raan nee hetan apoiu husi CVTL, Banco de Sangue, Pertamina, Banku Mandiri, BRI, Timor Plaza, FFG, Sylvia Dili, GBI Rock, Caravelha, Jatim Food, Cini Farmacia, Mie Doben, ANL, Moris Living Water, Air Timor no sel-seluk.
Nia esplika katak ba sira neebe volulariamente oferese sira nia raan inklui sira nia familia neebe partisipa iha atividade dosaun raan nee hetan prezenti (doorprize) hanesan, tikete aviaun Air Timor Dili-Bali Ba Mai (BM), no prezenti sira seluk hanesan, voucher mina nian husi Pertamina no prezenti sel-seluk tan.
“Ami fó prezente ida-ne’e ba doadór sira atu enkoraja sira atu fó raan ba ema neebe presiza,” tenik Maria.
Entretantu, Minister Consellor iha Embaixada Repúblika Indonézia, Nugroho Yuwono Aribhimo reprezenta Embaixador Indonezia ba Timor Leste, hatete nia apresia tebes ho atividade doasaun raan neebe organiza husi FFG servisu hamutuk ho CVTL no Banco de Sangue realiza atu ajuda ema seluk neebe presiza raan.
“Embaixador Indonezia ba Timor Leste, Okto Dorinus Manik agora dau-daun iha hela Yogyakarta, Indonezia, hamutuk ho Primeiru Ministru, Kay Rala Xanana Gusmao partisipa iha enkontru entre Indonezia-Timor Leste koalia kona-ba negosiasaun fronteira martima. Maibe, Embaixador hato’o kumprimentus manas ba ita hotu no hein katak atividade nee bele lao ho diak no susesu,” hatete Nugroho.
Tuir Nugroho, nia rasik dala tolu ona partisipa iha asaun doasaun raan neebe organiza husi FFG servisu hamutuk ho CVTL no Banco de Sangue HNGV Dili, maibe, nia la fo nia raan iha asaun doasaun raan nee tanba fator saude.
Nia hato’o agradese ba doador sira neebe voluntariamente fo sira nia raan iha atividade doasaun raan nee, neebe mai husi empreza estadu Indonezia nian hanesan, Banku Mandiri, BRI, Telkomcel no empreza privadu husi Indonezia.
“Ida nee hanesan aktividade humanitaria ida atu fahe ba maluk sira neebe presiza tulun husi ita,” dehan Nugroho.
Iha fatin hanesan, Pendeta Binsar Simangunsong, MTH, husi Igreja ROCK Akadiruhun, hatete husi nia parte mos apresia tebes atividade doasaun raan nee, tanba ho raan turuk ida bele salva ema nia moris. Nia espera atividade umanitaria hanesan nee tenke halao bei-beik, tanba ema barak mak presiza tulun husi maluk sira neebe ho voluntariamente fo tulun ba maluk sira neebe presiza.
Nunee mos, Koordenador Departamentu Banco de Sangue HNGV Dili, Tomas hatete atividade doasaun raan nee presiza halo bei-beik, tanba ema barak mak presiza raan. Nia dehan, antes nee atividade hanesan halo husi KAEBAUK no APORTIL, maibe ema neebe fo sira nia raan ladun barak hanesan Mami halo nee.
“Raan neebe kolleta ohin nee, ami sei tau iha Departamentu Banco de Sangue no balu ami sei haruka ba ospital Baukau,” dehan Tomas.
Tuir nia, stok raan iha HNGV sufisiente, maibe typu raan neebe ema presiza tebes mak typu raan A negativu. “Typu raan neebe menus mak AB, A no O negativu. Raan nee tama barak no sai mos barak,” tenik nia.
Iha fatin hanesan, dr. Alex hatete agora dau-daun stok raan iha HNGV Dili sei iha 61 kompostu husi typu raan A+, B+, O+ no O negativu.
“Atu responde ba preokupasaun kona-ba raan, ami halo ligasaun ho grupu oi-oin halo atividade asaun doasaun raan kada fulan 3 ka 4 dala ida. Husi ami nia servisu kolleta raan liuhosi doasaun raan hanesan nee, estoke raan limitadu liu mak typu raan AB, tanba ba typu raan ida nee ema limitadu liu,” hatete dr. Alex.
Jornalista: Mikael Mali Mau
Editor: Mikael Mali Mau
