JOGJAKARTA, STLTIMORLESTE.com – Primeiru Ministru (PM), Kay Rala Xanana Gusmão halao vizita ofisial ida hodi hasoru malu ho Liurai Jogjakarta, Sri Sultan Hamengkubuwono X iha ninia servisu fatin Rejiaun Espesial Jogkarta (DIY).
Primeiru Ministru halao vizita ba Liurai Jogjakarta nee, bainhira partisipa ajenda negosiasaun da-ruak bá Fronteira Maritima entre Timor-Leste ho Indonezia.
“Priveleiju ida ba hau. Ida-nee nuudar hau-nia prezensa da-huluk iha Jogjakarta. Buat ida neebe halo hau senti hakfodak maka foin hatene istória kona-bá Jogjakarta, hafoin hasoru-malu ho Sri Sultan. Antes nee hau rona deit mak naran Jogjakarta, neebe buat neebe halo hau hakarak tebes atu mai maka Borobudur neebe besik Jogjakarta maibe la hatene ninia diferensa unika entre Jogjakarta ho Provínsia sira seluk,” dehan PM Xanana liu husi nota komunikadu imprensa neebe STL asesu husi media Gabineti Primeiru Ministru, Tersa (09/12/2025).
Xefe Governu sente ondradu tebes tanba hasoru-malu ho Sri Sultan hodi bele koalia ba malu no bele komprende diak liu-tán, hatene diferensa unika iha Indonézia neebe ho ninia illa kiik-oan barak tebtebes.
Biban hanesan, Sri Sultan Hamengkubuwono X agradese ba Primeiru Ministru, tanba bele iha biban hodi halao vizita mai Jogjakarta.
“Ami nain-rua koalia oitoan kona-ba istoria Jogjakarta nian. Loos duni, katak ita presiza fo hanoin ba malu hodi hadia ita-nia nasaun. Hau espera ho vizita nee ita-nia relasaun sei di’ak liu-tan tanba timoroan barak mós estuda iha Jogja,” Liurai nee afirma.
Entretantu akompanha Primeiru Ministru iha vizita nee maka Embaixador Timor-Leste iha Indonezia, Roberto Soares no Embaixadór Indonezia iha TL, Octo Dorinus Manik.
Sri Sultan Hamengkubuwana X moris iha loron 2 fulan-Abril tinan 1946 ho naran Bendara Raden Mas Herdjuno Darpito nu’udár Sultan 10 Ngalkarya nian.
Sultanadu Hadiningrat neebe ukun dezde 1989 no mos halao knaar nuudar Governador da-toluk ba Rejiaun Espesial Yogyakarta dezde 3 Outubru 1998 too agora.
Herjuno Darpito moris iha nobreza Palásiu Yogyakarta nian ho títulu Bendara Raden Mas (BRM), titulu ida neebe tradisionalmente fo ba desendente besik sira husi ukun-nain atual ka antigu sira.
Nia maka oan-mane boot liu-husi Hamengkubuwana IX no nia kaben da-ruak, Kanjeng Raden Ayu (KRAy) Windyaningrum, neebe nia kaben iha tinan 1943.
Tuir regulamentu palasiu nian, nia pozisaun nuudar oan-mane boot halo Herjuno sai figura ida neebe maka tradisionalmente konsidera nuudar kandidatu prinsipal ba ninia desendente.
Jornalista: Alberto Menezes
Editora: Carme Ximenes
