DILI, STLTIMORLESTE.com – Feto Potensial Maria Amaral hatete, Governu nia papel importante hodi halao sosializasaun hodi responde ba violensia dijital bazeia ba jeneru, nunee sosiedade bele komprende.
“Tanba dala barak ema uza media sosial la tuir nia daan balun ameasa feto, no balu mos uza hodi hatudu nia isin molik sira ba feto ida nee hahalok neebe mak ladun diak, bele halo ema trauma tanba nee mak sosializasaun hodi responde ba violensia dijital bazeia ba jeneru nee importante tebes,” dehan Maria ba STL, Tersa (09/12/2025).
Nia mos rekomenda ba Governu liu husi Sekretaria Estadu ba Igualdade (SEI) halao sosializasaun labele iha nasional deit, maibe too iha area remotas sira nunee sosiedade hotu bele komprende, tanba barak iha Dili bele asesu husi televizaun no radio maibe iha area remotas povu barak la asesu ho diak.
“Tanba nee husu nafatin halo sosializasaun maibe sosializasaun nee labele kontra iha kapital nasaun deit, maibe presiza ba too iha area remotas sira nunee publiku liu liu sosiedade sir abele kompre komprende,” katak nia.
Nunee mos Sekretaria Estadu ba Igualdade (SEI), Elvina Sousa Carvalho hatete, tema tinan ida nee kampanha 16 Violensia dizital, ema balun konkluzaun.
“Hau hatete uza kampanha 16 violensia dizital ita koko atu halo advokasia para feto no labarik feto sira liu liu labarik feto sira sente seguru bainhira uza Plataforma dizital sira hanesan facebook, youtube, Tiktok, tanba dala barak mos ema uza fali sosial media hanesan fatin neebe mak livre ba espresaun no tolok no halo defamasaun ba feto halo espluitasaun seksual mos, hau hanoin ida nee labele,” dehan governante nee.
Nia hatete, dala barak ema hanoin buat sira nee babain, maibe nia iha impaktu psikologia neebe boot ba ema neebe hetan buling iha Online halo ema nee bele oho aan, ida nee mos halo nia sente moris nee la seguru.
“Balu nee edit ema nia foto molik maibe lolos laos molik entaun ho kampanha ida nee hodi halo sosializasaun ba publiku, atu nunee uza media sosial ho diak ho seguru nunee feto no labarik feto uza media sosial ho seguru,” katak nia.
Governu liu husi Sekretaria Estadu ba Igualdade (SEI), sosiedade sivíl, lideransa komunitaria no parseiru internasional sira bele halo atu responde ba violensia dijital neebe bazeia ba jeneru (VDBJ) hanesan bele hasae konsiensia publika nian, fo treinamentu, dezenvolve lei no polítika sira, no mos bele hamriik no koalia sai sekarik ita rasik sai sasin ba violensia nee.
SEI hamutuk ho sosiedade sivil hamutuk ho parseru atu halo esforsu liu husi sosializasaun sira responde ba violensia dizital neebe bazeia ba jeneru.
Programa promove utilizasaun teknolozia seguru iha setor edukasaun no igreza, fo treinamentu oinsa uza media sosial ho etika, dezenvolve lei no politika konaba violensia dizital bazeia ba jeneru, ema hotu tenke hamriik no koalia hasoru violensia dijital bazeia ba jeneru iha espasu Online.
Jornalista: Emerenciana Pinto
Editora: Carme Ximenes
