BAUKAU, STLTIMORLESTE.com – Konselhu Munisipal Kombatentes Libertasaun Nasional (KMKLN) Baukau seidauk simu lista kombatentes no martires, neebe tuir planu Governu sei atribui direitu iha loron 15 Dezembru 2025.
Prezidente KMKLN Baukau, Fernando Beredu’u Gusmão hateten, husi numeru kombatente no martires neebe rejistu iha tinan 2009, liu husi Konselhu Munisipal Kombatentes Libertasaun Nasional Baukau submete ba nasional, neebe, atu simu direitu iha loron 15 Dezembru 2025 lista jeral ba benefisiariu sira, KMKLN Baukau sidauk simu.
“Lista simu osan dia 15 nian nee lista ami seidauk simu, maibe ida neebe mak odibaihira 3a7, 8a14 aseita atu simu dia 15 atu simu ona, maibe simu nee simu hotu iha Dili ga simu iha Munisipiu ida idak nee mak ami sidauk hatene,” Prezidente KMKLN Baukau, Fernando Beredu’u Gusmão hateten ba STL iha knaar fatin Vila Antiga, Kuarta (10/12/2025).
Maibe nia katak, tuir informasaun neebe iha ba kombatentes ho rekoinhesementu dedikasaun 3a7 parte ekipa nasional sei atribui direitu iha edifisiu KMKLN kada Munisipiu enkuantu dedikasaun 8a14 no martires sira antes nee loke ona konta bankaria nunee direitu ba pagamentu sei transfere liu husi numeru konta bankaria.
Beredu’u garantia, bainhira prosesu pagamentu ba kombatentes no martires sira iha Munisipiu Baukau sei laiha problema, tanba molok too iha faze pagamentu, antes nee Ministeriu Asuntu Kombatentes no Libertasaun Nasional liu husi Konselhu Kombatentes Libertasaun Nasional relata hikas ona dadus benefisiariu sira ba nivel Konselhu Munisipal sira hodi taka iha nivel Suku neebe kauze kombatentes no familia martires sira aseita ona atu simu direitu pagamentu iha loron determinadu, tanba prosesu hotu konklui ona.
“Ida nee hau hanoin la problema. Kuandu simu ona la problema sira aseita nee mak atu simu ona nee, sira ida hodi bainhira halo reklamasaun nee mak sidauk hadia hotu nia rezultadu sidauk iha,” Beredu’u komenta.
Prezidente KMKLN Baukau nee husu kombatentes no familia martires sira neebe atu simu pagamentu iha loron 15 Dezembru 2025, atu nafatin akompanha Informasaun ba planu pagamentu, tanba informasaun klaru ba pagamentu Konselhu Munisipal Kombatentes Libertasaun Nasional Baukau sei simu iha loron 14 Dezembru 2025.
Entretantu lista edital 2025 ba kombatentes sira neebe rejistu iha tinan 2009 husi Munisipiu Baukau hamutuk rihun 10 resin, kompostu dedikasaun eskluzivu ho 24 anos, 15a19 no 8a14 hamutuk 319, no hirak neebe halo reklamasaun husi dedikasaun eskluzivu 3a7 hamutuk nain 4.401, enkuantu 0a3 rejistu hamutuk nain 5.991.
Jornalista: Tomas Reis
Editora: Carme Ximenes
