DILI, STLTIMORLESTE.com – Programa Ai-haan Mundial (WFP) ho Governu lansa apoiu nutrisaun ai-haan ba inan no labarik besik nain 8.500.
Programa Ai-haan Mundial (WFP/PAM), iha kolaborasaun ho Ministeriu Solidariedade Sosial no Inkluzaun (MSSI), Ministeriu Saude (MS), no Autoridade Munisipiu Manatuto lansa distribuisaun Ai-haan Nutrisaun Espesializadu (SNF) ba inan isin rua, inan fo susu no labarik sira neebe vulneravel ho idade tinan tolu mai kraik.
Lansamentu nee halao iha Postu Administrativu Soibada hamutuk ho lider governu sira, autoridade lokal sira, Gabinete Kooperasaun Fransa, no WFP/PAM sira atu ofisialmente hahu distribui ai-han neebe fortifikadu hodi hadia nutrisaun inan no oan iha Timor-Leste.
Inisiativa nee sei hahu iha Manatuto no sei habelar ba Aileu, Ainaro no Baucau, hodi benefisia inan no labarik kiik besik nain 8.500 liu husi fornese SNF tonelada metrika 153, inklui super cereal no super cereal plus – hahan fortifikadu no kahur hodi responde ba sira-nia nesesidade nutrisaun.
Timor-Leste kontinua hasoru numeru malnutrisaun neebe aas entre labarik sira neebe seidauk too tinan tolu no feto sira neebe ho idade reprodutiva. Liu husi esforsu konjunta ida-nee, WFP/PAM no Governu Timor-Leste servisu daudaun hodi hametin sistema protesaun sosial no saude hodi asegura katak família vulneravel sira simu nutrisaun neebe sira presiza. Maske rekursu sira nafatin limitadu no kobertura iha nasaun laran seidauk posivel, parseiru sira afirma sira-nia kompromisu atu hamenus no prevene malnutrisaun iha nasaun laran tomak.
Tuir Komunikadu neebe STL asesu husi media WFP Kinta (11/12/2025) hatete, lansamentu ida-nee reflete kapasidade parseria nian.
Reprezentante nasional WFP “Hamutuk ho MSSI, MS, no apoiu husi Governu Fransa foti ona pasu importante ida atu hadia nutrisaun ba inan no labarik sira iha Timor-Leste. Maski dezafiu sira sei mosu nafatin, maibe kompromisu atu hapara malnutrisaun la iha tan.
Ministru Solidariedade Sosial no Inkluzaun Veronica Das Dores hateten, importansia husi esforsu koordenadu sira.
“Liu husi inisiativa ida-nee, ita hametin protesaun sosial no asegura katak família vulneravel sira simu apoiu neebe sira presiza ba futuru ida-neebe saudavel,” dehan nia.
Distribuisaun nee hetan liuhusi apoiu jenerozu husi Governu Fransa, neebe finansia aprovizionamentu ba ai-han nutritivu espesializadu sira.
Kona-ba WFP/PAM Programa Ai-han Mundial Nasoins Unidas nian mak organizasaun umanitaria boot liu iha mundu hodi salva moris iha situasaun emerjensia no uza asistensia ai-han hodi harii dalan ida ba pas, estabilidade no prosperidade ba ema sira neebe rekupera husi konflitu, dezastre no impaktu husi mudansa klimatika.
Jornalista: Emerenciana Pinto
Editora: Domingas Gomes
