DILI, STLTIMORLESTE.com – Xefe Kaza Sivil Prezidensia Republika, Jesuina Maria Ferreira Gomes, husu Governu kria enkuadramentu legal atu promove tais.
Xefe Kaza Sivil Prezidensia Republika, Jesuina Maria Ferreira Gomes, hatoo kestaun nee liu husi diskursu, bainhira partisipa iha abertura komemorasaun Loron Nasional Tais ba dala-IV neebe halao iha Palasiu Prezidensial Nicolau Lobato, Dili, Kinta (11/12/2025).
“Husu ba Governu atu kria enkuadramentu legal hodi promove tais iha eventu ofisial sira, hanesan hatais tais iha serimonia hasae bandeira kada fulan no serimonia boot sira seluk tan,” dehan Xefe Kasa Sivil nee.
Xefe Kasa Sivil hatutan, Prezidente Republika promove tais makaas loos liu husi dekorasaun sira iha Palasiu Prezidensial, nomos sempre uza tais ba vizita Estadu no ofisial ba rai liur. Tais rejistu ona hanesan patrimonio kultural iha UNESCO tanba nee mak ita hotu tenke promove no preserva tais.
Jesuina Gomes hatoo Parabens ba inan feto soru nain sira neebe tuir hela kompetisaun, nia apresia no kontente haree maioria foin-sae sira mak soru tais.
Serimonia nee realiza no organiza husi Ministru Komersiu no Industria, Filipus Nino Pereira, no partisipante sira hosi munisipiu 12, inklui RAEOA, no Atauro.
Iha ninia diskursu kona-ba tema ho tais, “Hametin ita-nia identidade Nasional, Ministru Pereira apresia kolaborasaun institusional no subliña katak Tais mak simbolu konsensu nasional” neebe fo esperansa ekonomika no orgullu kultural,”dehan nia.
Komemorasaun nee sei halao too loron 14 fulan-dezembru, ho ezibisaun, kompetisaun soru tais, no seminariu edukativu kona-ba kor natural no integrasaun kurrikulu. Festival sira nee sei termina iha loron-domingu nee ho Tais 𝐹𝑎𝑠ℎ𝑖𝑜𝑛 𝑆ℎ𝑜𝑤 no diskursu enserramentu ofisial hosi Xefe Estadu, Jose Ramos-Horta, hodi reafirma Estadu nia dedikasaun atu salvaguarda Tais ba jerasaun futuru sira.*
(eme)
