DILI, STLTIMORLESTE.com – Ministru ba Asuntu Kombatente Libertasaun Nasional (MAKLN), Gil da Costa “Oan Soru” hateten, Governu sei halao pagamentu ba pensaun veteranu nian, hahu iha loron 15 Dezembru too Janeiru 2026.
“Labele hanoin pagamentu ohin hotu ona, ohin ami ami atende aban ami atende to Janeiru tinan 2026 mos ami sei atende nafatin ita bot sira to hetan hotu ita bot sira nia direitu,” hatete Ministru Asuntu Kombatented Libertasaun Nasional (MAKLN), Gil da Costa “Oan Soru” liu husi diskursu iha edifisiu MAKLN, Komoro, Segunda (15/12/2025).
Governante nee husu veteranu sira atu kontribui, nunee prosesu pagamentu ba pensaun veteranu nee bele lao ho diak.
Nia mos dehan, veteranu sira neebe hahu loron 15 Dezembru nee simu sira nia direitu ba pensaun nian, sei kontribui mos osan US$30 ba fundu veteranu nian.
“Ita boot sira neebe agora dadaun atu simu pensaun iha fulan ida nee, ita bot sira mos sei kontribui US$ ba fundu veteranu nia sei hahu iha fulan ida nee. Tanba regras kria tia ona katak Kombatente ida neebe simu osan nia tenki kontribui ba futuru ninia jerasaun nian labele simu ohin aban hotu ona,” tenik Oan Soru.
Molok nee Governu Konstitusional liu husi Ministeriu ba Asuntus Kombatentes Libertasaun Nasionál (MAKLN), kalendariza ona atu halo pagamentu pensaun Veteranus nian bá Kombatente sira, hamutuk nain atus-neen (600) resin iha faze da-huluk nian iha loron 15 fulan-Dezembru tinan 2025.
Kombatente sira neebe atu hahu simu pensaun iha fulan-ida nee mai hosi sira neebe mak rejistadu iha segundu rejístu tinan 2009 nian, inklui sira neebe ninia dadus pendente kedas iha primeiru-rejistu 2003 no 2005.
Tuir dadus, ema sira neebe durante nee simu hela pensaun, inklui dadus sira iha segundu-rejistu 2009 nian hamutuk rihun 43. Dadus ida-nee inklui pensaun oioin mak hanesan, balu sei hetan pensaun Vetaranu ho tinan 24, balu 15/19, no barak liu mak simu pensaun 8/14 ho pensaun sobrevivensia.
Enkuantu montante osan neebe mak MAKLN sei uza hodi halo pagamentu Kombatente sira iha fulan ida-nee nia klaran hamutuk Milhaun US$49. Maibe, husi millaun US$49 nee kotegoria hanesan brutu, no likidu nee hamutuk milaun US$44 resin (US$ 44.294,144,12).
Jornalista: Alberto Menezes
Editora: Carme Ximenes
