BAUKAU, STLTIMORLESTE.com – Relasiona deklarasaun husi komunidade Suku Uaitame neebe planu atu lori Konselhu Konsultivu Munisipal (KKM) Baukau ba Tribunal, KKM fo avontade hodi komunidade Suku Uaitame neebe la satisfas bele halo rekursu.
Atu fo hanoin fali katak, iha loron 11 Dezembru 2025, komunidade Suku Uaitame realiza konferensia imprensa hodi kontra rezultadu votasaun husi KKM Baukau neebe realiza elisaun iha loron 09 Dezembru 2025, diside Suku Uaitame hamutuk ho Postu Administrativu Kelikai Antigu.
Durante konferensia imprensa komunidade sira konsidera, desizaun KKM Baukau respeita no la konsidera komunidade Uaitame nia direitu, tanba nee komunidade Uaitame sei lori KKM ba Tribunal.
Hatan ba kestaun nee, Prezidente Konselhu Konsultivu Munisipal, Veneranda Lemos hateten, ligadu ho Suku Uaitame laiha dezisaun ida atu fo satisfasaun ba ema hotu hotu, tanba iha ema balu tenta fo komentariu katak, Konselhu Konsultivu Munisipal laos orgaun atu foti dezisaun ba Suku Uaitame no Abafala, maibe haluhan tiha katak, Konselhu Konsultivu Munisipal realiza hodi foti dezisaun ba Suku 2 refere lei mak haruka.
“Se la kontente dala iha ba rekursu avontade, tanba Suku Uaitame ho Suku Abafala nia nee lori tinan naruk, bainhira ita la halo desizaun lalais afeta ba jovem sira neebe hakarak sai ba rai liur, estudante sira trara sira nia dokumentus, inan aman sira tama terseira idade, veteranu sira labele prosesu dokumentus, tanba la hatene loos hamriik iha neebe, entuan hakarak ga lakohi, gosta ga la gosta prezisa duni halo desizaun, se komunidade la kontente dalan nakloke bele ba,” Veneranda hateten ba jornalista STL iha salaun apuramentu Vila Nova, Baukau, Tersa (16/12/2025).
Prezidente nee katak, Autoridade Munisipiu Baukau foti desizaun liu husi KKM hodi deside Suku Uaitame ba Postu Kelikai Antigu no Suku Abafala ba Postu Kelikai Antigu Autoridade Munisipiu Baukau la foti desizaun mesak, maibe fo votus husi membru KKM sira no Autoridade Munisipiu Baukau inisia planu hodi foti desizaun ba Suku 2 refere, tanba Suku 2 refere nia paradeiru ba Postu Administrativu la klaru.
Nunee Autoridade Munisipiu inisia planu refere atu deside Suku 2 refere nia pertense ba Postu Administrativu ida hodi labele difikulta ba sidadaun sira neebe trata dokumentu.
“Dalan nakloke bele ba rekursu laiha problema, tanba nee prosesu se ita la halo sala, ita halo tiha sala nafatin entaun ita atu tuir loos se,” Veneranda sublina.
Nia rekonhese, problema Suku 2 refere antes nee Autoridade Munisipiu Baukau hamutuk ho ekipa Nasional halo ona dialogu ho komunidade sira konsentra iha Sede Suku Abafala, maibe la iha solusaun. Nunee Autoridade Munisipiu husu orientasaun husi Ministeriu Administrasaun Estatal no oriente hodi lori ba iha Konselhu Konsultivu Munisipal.
Tanba nee Autoridade Munisipiu Baukau realiza Konselhu Konsultivu Munisipal hodi deside Suku 2 nee, maibe bainhira komunidade sira la satisfas ho rezultadu votasaun husi KKM bele halo rekursu.
“Hau husu ba komunidade sira neebe la gosta hau husu deskulpa, mais laiha desizaun ida ke fo satisfasaun ba ema hotu hotu, se la konkorda dala iha,” Veneranda katak
Nia informa, rezultadu votasaun husi KKM Baukau neebe deside ona destinua Suku Uaitame ba Postu Kelikai Antigu no Suku Abafala ba Postu Kelikai, iha loron 16 Dezembru 2026 parte Autoridade Munisipiu Baukau aprezenta ona ba Nasional hafoin Governu Sentral solusiona.
Jornalista: Tomas Reis
Editora: Carme Ximenes
