DILI, STLTIMORLESTE.com – Profesores 200 resin husi eskola sira Munisipiu Dili sei tama reforma obrigatoriu iha Janeiru 2026.
Diretur Servisu Edukasaun Munisipiu Dili, Sabino Perreira dehan, Munisipiu Dili ninia profesores hamutuk 200 resin mak sei tama iha reforma obrigatoriu.
“Ita profesores neebe moras prelongada nee hau ladun lembra didiak, maibe Munisipiu Dili ninia nee ita identifika ona profesores hamutuk 200 resin mak sei tama iha reforma obrigatoriu iha Janeiru 2026,” dehan nia ba STL, Kinta (18/12/2025).
Nia akresenta, profesores 200 resin neebe sei tama iha reforma obrigatoriu, sira nee sei substitui fali bolsa kandidatu profesores sira. Numeru profesores reforma neebe ohin mensiona nee kompostu husi nibel ensinu baziku, sekundariu no tekvo.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao hatete, professores neebe mak moras prelongada nee dadus haruka ba ona iha rekursu umanu nasional.
Nunee mos Diretur Servisu Edukasaun Munisipiu Likisa, Julio da Silva dehan, professores iha eskola sira Munisipiu Likisa balun moras no la hanorin estudantes sira iha eskola, tanba nee ba oin presiza aumenta professores, liu-liu ba eskola neebe ninia profesores ho kondisaun moras no balun atu tama ba idade reforma ninia.
Jornalista: Jacinta Sequeira
Editora: Domingas Gomes
