DILI, STLTIMORLESTE.com — Institutu Nasionál Kombate HIV/SIDA (INCSIDA) reforsa sensibilizasaun ba juventude kona-ba HIV, hodi hasa’e konsiénsia no promove hahalok preventivu.
Prezidente INCSIDA, Daniel Marçal afirma katak, sensibilizasaun importante atu prevene transmisaun HIV, maibé ema ida-idak tenke iha responsabilidade atu proteje nia saúde rasik.
Daniel Marçal hato’o deklarasaun ne’e ba jornalista sira iha salaun INCSIDA, Pantai Kelapa, Dili, Tersa-feira (13/10/2026).
“Ita bele halo sensibilizasaun maka’as, maibé ema ida-idak tenke foti asaun atu proteje nia an rasik,” Daniel Marçal hatete.
Nia esplika katak, falta konsiénsia kona-ba HIV no nia impaktu bele aumenta risku infesaun, liuliu ba ema ne’ebé la aplika medida preventiva.
“Ita hanesan instituisaun bele reforsa sensibilizasaun atu hasa’e konsiénsia. Ema hotu tenke halo teste, no se rezultadu pozitivu, tenke hetan tratamentu,” nia dehan.
Daniel Marçal informa katak, ema ne’ebé suspeita iha risku infesaun HIV bele halo teste ran atu hatene sira-nia estatutu HIV.
Nia subliña katak, deteksaun no tratamentu sedu importante atu proteje saúde, hadi’a kualidade moris no hamenus risku transmisaun HIV.
Iha fatin hanesan, Diretór Ezekutivu Associação Ramelau Oan Moris Domin iha Timor-Leste (AROMDTL), Gaspar da Costa Pacheco, konsidera sensibilizasaun ba juventude importante tebes.
“Ami iha koordenasaun di’ak ho INCSIDA atu lori joventude sira mai rona informasaun kona-ba HIV/SIDA, hodi sira bele proteje an no moris saudavel,” nia deklara.
Gaspar afirma katak, kolaborasaun ho INCSIDA visa ajuda juventude sira komprende risku transmisaun HIV, adopta hahalok preventivu no prepara futuru ne’ebé saudavel.
Nia espera katak, informasaun ne’ebé juventude sira simu bele aumenta sira-nia konsiénsia atu prevene HIV no promove moris saudavel iha komunidade.
(jen)
