DILI, STLTIMORLESTE.com – Visi Primeiru Ministru, Francisco Kalbuadi Lay hatete, atividade tinan 2026 sei foka ba area ekonomia, ba oin nafatin koopera ho Prezidente Republika (PR) Jose Ramos Horta ho ekipa.
Visi Primeiru Ministru no Ministru Koordenador Assuntu Ekonomia no Ministru Turizmu no Ambiente, Francisco Kalbuadi Lay informa, iha tinan 2026 sei foka liu ba area ekonomia, no iha biban nee Ministru hatoo agradese ba Prezidente Republika Jose Ramos Horta neebe durante tinan 2025 koopera ho Governu halao atividade lubuk ida iha Palasiu Prezidensial no ba oin sei koopera nafatin hodi halao atividade neebe foka ba ekonomia.
Visi Primeiru Ministru, Francisco Kalbuady Lay hatoo kestaun nee ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kuarta (14/01/2026).
“Uluk nanain permite hau hatoo nafatin bom ano ba media sira hotu, ohin oportunidade diak ida nee, tanba komesa husi tinan foun too agora hafoin oportunidade mai hasoru Prezidente Republika, primeiru mai relata hela servisu neebe mak agora atu hahu ba oin, no atualiza situasaun hotu liu-liu agradese mos ba Prezidente iha 2025 neebe mak entre fatin Palasiu Prezidensial iha kooperasaun lubuk ida hamutuk Ministeriu Turizmu no Ambiente liu-liu atividade desportivu, atividade kultural, ho buat sira nee hotu mai hatoo ba Prezidente dehan katak liu husi desizaun Konselhu Ministru liu-liu orientasaun husi Primeiru Ministru nia, atan hau kontinua koopera nafatin ho ekipa Prezidensial nia ba iha 2026, ida nee deit mak ohin mai relata hela ba Prezidente laiha assuntu seluk,” dehan nia.
Visi Primeiru Ministru dehan, nafatin halao kooperasaun ho Prezidente Republika no ekipa prezidensial hodi halao atividade no programa neebe mak aprova ona husi Parlamentu Nasional.
“Tuir programa neebe mak aprova tiha ona husi parlamentu sei kontinua halao nafatin, nunee mos hau aktualiza situasaun oituan sobre ita nia situasaun ekonomia hanesan momentu, tanba ho situasaun mundial agora neebe akontese karik ita konsentra liu liu ba ita nia uma laran deit,” katak Visi Primeiru Ministru.
Membru Governante nee dehan, tuir orietasaun husi Primeiru Ministru ba membru Governu hotu hotu katak tinan ida nee tinan asaun, tanba nee nia parte sei konsentra iha ekonomia ba oin.
“Neebe hau nia servisu mak nee, hau sei koordena nafatin ho ministeriu sira seluk liu-liu ba assuntu ekonomiku nia, hanesan agrikultura, telekomunikasaun, peskas, floresta, nunee mos ho area sira seluk,” katak nia.
Aleinde nee Governu mos esforsu makaas atu dada investor sira husi nasaun seluk mai halo investimentu iha Timor Leste, too oras nee investor hira mak mai ona halo investimentu no hira tan mak sei mai? Hatan ba kestaun nee Visi Primeiru Ministru hatete, husu investor hira nia seidauk garante investor hira.
“Husu investor hira hau seidauk bele garante investor hira, maibe hau nafatin buka meius para bele atrai investor sira mai ita nia rai, tanba prioridade agora mak ba ekonomia neebe area hotu-hotu importante maibe liu liu ita konsentra liu ba investimentu,” katak Visi PM.
Primeiru Ministru Kay Rala Xanana Gusmão mos hatete bebeik ona katak, tinan ida nee 2026 sei kria banku dezenvolvimentu nasional atu fasilita emprezariu lokal sira atu dudu ekonomia laos nasional deit maibe too iha baze sira liu liu emprezariu sira kiik ho mediu sira nee.
(eme)
