DILI, STLTIMORLESTE.com – Primeiru Ministru (PM), Kay Rala Xanana Gusmão hatete, buat neebe sai urjente ba ezekusaun Orsamentu Jeral Estadu (OJE) tinan 2026 iha munisipiu sira foka liu ba merenda eskolar.
Primeiru Ministru Kay Rala Xanana Gusmão hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairru Pite, Kinta (15/01/2026).
PM hatete, buat neebe prioridade ba ezekusaun orsamentu iha munisipiu sira mak Mereda Eskolar.
“Buat neebe agora sai hanesan urjente liu ba ezekusaun orsamentu iha munisipiu mak merenda eskola, se lae neineik so iha April ona mak foin hahu fulan 3 nee labarik sira la han depois osan nee tau hela iha neeba, tanba imi la hatene ami la informa,” dehan Primeiru Ministru.
Primeiru Ministru hatete, iha Dili deit mos akontese, se konta munisipiu sira too aban mos konta seidauk hotu, Iha Dili mos sukat tiha osan ba ida nee no ida neeba maibe la gasta nee ba mereda eskolar deit laos ba buat seluk.
“Ida nee mak ami dehan osan iha neebe ona tenke hatama, tanba fim do ano osan neebe la gasta 25 sentavus mos tenke fila tanba osan nee povu nia, buat sira nee hotu mai husi Governu anterior neebe dehan garante opsaun do planu, planu laiha grade opsaun deit akontese buat sira hanesan nee, neebe mai informa mos ba Prezidente ho ida nee mak Domingu sei ba ho Ministru Administrasaun Estatal sei ba Oekusi,” katak PM Xanana.
Xefe Governu hatete, iha Domingu Primeiru Ministru ho MAE sei ba Oekusi, no Ministru halo ona avaliasaun iha fatin hotu-hotu kona-ba avaliasaun estrutura administrativa.
“Temi Oekusi nee tau iha ita nia ulun munisipiu lalika temi RAEOA, lalika temi ZEEMS, lalik temi zona, buat sira nee iha hotu maibe la lao, ZEEMS tinan 10 ita la hatene ZEEMS nee saida, ema balun dehan nee iha hau nia ulun entaun rai hela ba o lori ba rai koak,” katak Xanana.
PM bolu atensaun ba Oekusi oan mak koalia no diskute no konhese rai rasik ba haree hotu hotu hodi prepara planu ba tinan 5 neebe sei hahu iha 2027 sei aprova sei tau osan, agora kompleta deit buat hotu.
(eme)
