DILI, STLTIMORLESTE.com – Prezidente Tribunal Rekursu (PTR), Afonso Carmona relata atividade jeral Tribunal nian ba Prezidente Republika (PR ), Jose Ramos Horta.
Bainhira remata hasoru malu, Prezidente Tribunal Rekursu, Afonso Carmona ba jornalista sira iha Palasiu Prezidensial Nicolau Lobato, Bairo Pite Kinta (15/01/2026) hatete, ohin mai hasoru malu ho Prezidente Republika hodi relata atividade jeral Tribunal nia ba Xefe Estadu.
“Ohin loraik nee hau marka prezensa iha nee atu informa situasaun jeral Tribunal nia, tanba tinan foun entaun ita informa situasaun sira nee ba Prezidente, atu fo hatene kona-ba situasaun jeral Tribunal, agora ita hahu ona servisu halo julgamentu buat sira lao diak ita iha Juiz estajiu hela iha foho nain 12,” dehan Prezidente Tribunal Rekursu.
Aleinde nee Prezidente Tribunal Rekursu hatutan, ho prosesu instalasaun tanba iha nee komisaun nomeia tiha ona, tanba nee nia labele fo komentariu.
“Hau labele komentariu ida nee,.tanba komisaun iha Tribunal prepara deit Juiz sira avaliasaun para bele karik posivel bele konkorda selesaun sai Juiz konseleru no Juiz iha iha Tribunal Rekursu, ida nee mak hau mai hatoo ba Prezidente Republika,” dehan PTR.
PTR Carmona dehan, Juiz sira hamutuk nain 32 mak atu konkore, mai husi numeru nee nain tolu idade seidauk too 10 anos, tanba nee aumenta ho estajiadu nain 12 tan.
“Hau la koalia barak, koalia deit komisaun harii ona ba instalasaun nee entaun komisaun mak bele koalia barak, uluk hau koalia instalasaun maibe agora hau labele koalia, maibe koalia deit saida mak Juiz sira prepara ba dokumentus sira nee, nee kestaun iha sira nia liman, hau so koalia deit numeru neebe prontu atu konkore maizumenus Juiz sira neebe konkore iha 32 ho Juiz estajiadu nain 12 hamutuk 44,” katak nia.
(eme)
