DILI, STLTIMORLESTE.com – Prezidente Republika (PR), Jose Ramos Horta seidauk rona imformasaun ruma kona-ba Visi Ministra Finansas rezigna aan husi nia kargu.
Prezidente Republika Jose Ramos Horta hatoo ba jornalista sira, bainhira remata halo enkontru vizita Roo iha Portu Dili Sesta (16/01/2026) hatete, seidauk rona imformasaun ruma kona-ba Visi Ministra Finansas rezigna aan husi nia kargu.
Prezidente Republika hatete, maske iha loron Kinta halo enkontru semanal ho Primeiru Ministru Kay Rala Xanana Gusmão iha palasiu, maibe Xefe Governu mos la koalia asuntu nee.
Iha informasaun balun katak Visi Ministra Finansas rezigna aan husi nia kargu, karik Prezidente simu ona informasaun ruma kona-ba ida nee, hatan ba kestaun nee Prezidente Republika hatete, nia seidauk rona informasaun kona-ba ida nee.
“Hau seidauk rona informasaun kona-ba ida nee, Visi Ministra Finansas nee hau seidauk rona, horiseik hasoru maun boot Xanana nia la hatete no la temi ida nee,” dehan PR Horta.
Nunee mos Primeiru Ministru Kay Rala Xanana Gusmao hatete, kona-ba Visi Ministra Finansas rezigna aan nee husu ba Visi Ministra deit. “Ba husu ba nia, husu fali mai hau,” dehan Primeiru Ministru Xanana Gusmão.
Tuir informasaun neebe STL hetan, Visi Ministra Finansas, Felicia Claudina da Cruz Carvalho ofisialmente hatoo karta rezignasaun. Karta refere hatoo ba Primeiru Ministru, Kay Rala Xanana Gusmão, iha 14 Janeiru 2026.
Visi Ministra aprezenta karta rezignasaun ba PM Xanana tanba konfrontu ho Ministra Finansas, Santina Viegas Cardoso, kona-ba diferensia hanoin ba politika no programa Ministériu Finansas nian.
(eme)
