DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus ba prosesu primeiru interogatoriu, deside aplika medida Aprezentasaun Periodika no Termo Indentidade Rezidensia (TIR) ba arguidu sira.
Arguidu nain neen (6) mak hanesan arguidu JSM, FQdC, TS, MB no arguida JMM ho LSdA.
Juiz Turnu Arjentino Nunes liu husi despaisu ikus iha loron Sabadu (17/01/2026) deside aplika medida Aprezentasaun Periodika no medida Termo Indentidade Rezidensia (TIR) ba JSM.
No arguidu nain lima seluk FQdC, TS, MB, JMM no LSdA, Tribunal deside aplika medida Termo Indentidade Rezidensia (TIR).
Hafoin despaisu husi Tribunal, tuir Advogadu Privadu Arlindo Sanches deklara katak, nia asistidu hanesan dekanu hetan medida TIR.
“Hau nia asistidu hetan medida TIR, tanba nee hau mos aseita ho medida nee,” dehan Arlindo.
Aleinde nee, Advogadu Privadu Napoliao de Olivera Carvalho deklara, nia fo asistensia ba asistidu nain rua, maibe hetan hotu medida TIR.
“Asistidu nain rua neebe hau fo asistensia ba, ida dekanu no ida foin lalais baixa hela iha hospital nee,”.dehan nia.
Aleinde nee, Defensor Publiku, Anzelmo Akara deklara katak, nia asistidu mos hetan medida TIR, tanba nee konkorda ho despaisu Tribunal nian.
Antes nee iha alegasaun ba prosesu nee, Prokurador Turnu Matias Soares deklara katak, husu Tribunal atu aplika medida Proibisaun de Auzensia no Medida Aprezentasaun Periodika ba arguidu nain tolu hanesan Reitor no Dekanu nain rua. Enkuantu ba arguidu nain tolu seluk, Ministeriu Publiku husu Tribunal atu aplika Medida Aprezentasaun Periodika (AP) no medida Termo Indentidade Rezidensia (TIR) ba arguidu nain tolu.
Nunee mos alegasaun husi parte Advogadu Privadu no Defensor Publiku arguidu sira nian, husu Tribunal atu aplika medida Termo Indentidade Rezidensia (TIR) ba arguidu sira.
Depois alegasaun Defeza Cansio Freitas deklara katak, iha alegasaun nia parte husu TIR.
“Husu TIR deit, tanba MP husu aprezentasaun Periodika, promosaun neebe MP aprezenta mai nee jeral deit, la espesifiku krime saida maka imputa ba sira,” dehan nia.
Nia sublina, iha deklarasaun arguidu sira nian deklara katak, la iha indisus forte atu prense rekejitus, konaba dono ba kazu nee.
Prosesu nee, prezide husi Juiz turnu Arjentino Nunes, Ministeriu Publiku reprezenta husi Prokurador Matias Soraes, no arguidu nain lima hetan asistensia legal husi Advogadu Privadu no Defensor Publiku.
(ter)
