DILI, STLTIMORLESTE.com – Prezidente Republika (PR), Jose Ramos Horta simu investor internasional husi nasaun Xina, Hong Kong no Singapura, hodi koalia apoiu investimentu estratejiku iha area agrikultura aviasaun no finansas iha Timor Leste (TL).
Prezidente Republika Jose Ramos Horta simu delegasaun ida husi investor internasional sira husi Xina, Hong Kong no Singapura, hodi koalia kona-ba planu investimentu estratejiku neebe atu apoiu dezenvolvimentu ekonomiku iha Timor Leste.
Bainhira remata halo enkontru delegasaun neebe lidera husi Michael ONG, ba Jornalista iha palasiu Prezidensial Nicolau Lobato Bairru Pite, Sesta (16/01/2026) hatete, kontente mai hasoru malu ho Prezidente Republika Jose Ramos Horta no informa ba Xefe Estadu kona-ba sira nia kontatu no sorumutuk foin lalais nee ho Primeiru Ministru, Kay Rala Xanana Gusmão, hanesan mos ho Ministeriu relevante sira, iha ambitu ba preparasaun no implantasaun inisiativa elevadu sira ba impatu ekonomiku no sosial.
Iha setor agrikultura, delegasaun sira aprezenta proposta atu introduz teknolojia “Juncao”, metodu inovador ida husi kultivu neebe sustentavel ho objetivu atu produs hahan animal no produtu esensial sira seluk.
Planu nee sei hahu ho faze pilotu durante fulan tolu antes kobre eskala neebe boot liutan. Iha kuadru kapasitasaun nasional, investidor sira hatoo sira-nia disponiblidade atu apoia bolsu estudu ba estudante Timoroan sira hodi aprende teknolojia nee iha Xina no hodi estabelese iha futuru baze formasaun ida neebe permanente iha Timor Leste hodi kapasita agrikultor lokal no setor privadu sira.
Enkontru nee mos koalia kona-ba proposta signifikativu sira iha aviasaun no finansas, inklui planu hodi aprezenta aviaun Airbus A320 rua hodi hametin ligasaun nasional, liu husi parseria ho Aero Dili ka liu hosi husu Sertifikadu Operador Ar (AOC) foun.
Aleinde nee, hafoin konsulta ho Banku Sentral, delegasaun nee aprezenta planu ba kuadru mikro-finansas ida neebe atu fornese asesu kreditu neebe diak liutan ba empreza kiik no media sira (PME).
Prezidente Ramos Horta hatudu ninia satisfasaun boot ho progresu neebe iha no simu ho haksolok potensial hosi investimentu sira-nee hodi kria kampu servisu no moderniza nasaun nia infraestrutura.
(eme)
