SUISA, STLTIMORLESTE.com – Prezidente Republika (PR) Jose Ramos Horta hatete, Timor Leste marka prezensa iha enkontru Annual Forum Ekonomiku Mundial (World Economic Forum) nee visibilidade ba TL, tanba rai kiik maibe partisipa hodi dada mos bandeira Timor nian iha mundu internasional.
Forum nee ho tema “Espíritu Dialogu” nian, konvoka líder global sira husi Governu, empreendedor no sosiedade sivíl hodi partilla dezafiu jeopolítiku, ekonomiku no ambiental sira neebe urjente.
Iha biban nee Prezidente Republika Jose Ramos Horta ba jornalista iha Davos, Suisa, Kuarta (21/01/2026) hatete, forum nee nia visibilidade ba Timor Leste tanba rai kiik maibe hola parte mos.
“Forum nee nia viziblidade ba ita tanba ita rai kiik ida, ita haree iha nee rai kiik, se mak mai tinan hira realiza forum nee laiha rai kiik hanesan ita nee mai nee visibilidade, Prezidente no Timor nia naran sempre prezente depois halo kontaktu, se mak mai nee tenke book aan, labele moe, labele tauk ba haree no koalia kedas,” dehan Prezidente Republika.
Prezidente Republika iha forum nee hasoru mos lider boot oin-oin neebe mak partisipa iha forum nee.
“Too ohin dadersan iha Aeroporto Zurich hau haris kedas iha Aeroporto, uza roupa tama kareta viajen kuaze oras tolu husi Aeroporto Zurich too Davos, sidade neebe tinan-tinan realiza Forum Ekonomiku Mundial,” dehan PR Ho
Xefe Estadu dehan, Timor Leste pais uniku, pais kiik maibe sira sempre konvida hodi marka iha prezensa Forum Mundial Ekonomiku, maske iha forum nee rai kiik seluk iha Afrika, ASEAN, Amerika Latin la marka prezensa, so Timor Leste mak rai kiik maibe partisipa.
“Hau simu konvite nuudar Prezidente dala tolu dala haat ona, nia utilidade iha ka lae? Utilidade diak tanba oportunidade hasoru ema barak laos deit rona ema nia diskursu, maibe hau mos halo koalia ho ema barak, no ohin tuur iha forum nee rona Prezidente Donald Trump, maibe hau aproveita hau haree Prezidente Israel iha neeba ami rua koalia oituan tanba hau simu konvite husi Israel atu ba vizita Israel, vizita ofisial iha fulan Abril, hau hasoru Primeiru Ministru Papua premeira vez nia mai, nia kontente los haree hau, hau mos hakarak vizita Papua tanba desde indepedensia hau ba dala ida nuudar Ministru Negosiu Estranjeiru maibe too agora la ba,” katak PR Horta.
Prezidente Republika hatete foin lalais mos koalia ona oinsa loke mos Embaixada Timor Leste iha Papua, labele foka deit rai boot sira iha ASEAN pois ignora fali rai kiik sira iha pasifiku nee.
Prezidente Republika hatete inisiativa neebe boot tebes ba Timor Leste iha rua ida konaba kuda ai protesaun vida Marina Oceano ho rai sira nee.
Iha biban nee Prezidente hatete, iha forum nee hasoru malu mos ho Prezidente FIFA Gianni Infantino.
“Ohin tuur iha laran hau hasoru Prezidente FIFA, koalia ho Prezidente FIFA nia mos prontu hakarak mai vizita, nia hakarak vizita, entaun fila ba Timor hau koalia ho Prezidente Federasaun ho Ministru Juventude no Desportu, para hamutuk ho hau Prezidente halo karta ba Prezidente FIFA mai vizita Timor Leste para FIFA bele apoiu boot liu tan ba desportu iha Timor liu liu Football,” katak PR Horta.
Aleinde nee, oinsa Prezidente Republika nia haree konaba diskursu husi Prezidente Donald Trump foka ba dame, no ekonomiku mundial. Hatan ba kestaun nee Prezidente Republika hatete haree Prezidente Trump koalia laos hanesan Prezidente Obama, la hanesan prezidente sira seluk, lolos nuudar lider superpotensia ida atitude tenke prudentu.
(eme)
