DILI, STLTIMORLESTE.com – Vise Ministra ba Asuntu ASEAN, Milena Maria da Costa Rangel halo aprezentasaun ida ba Konselhu Ministrus kona-ba partisipasaun Timor Leste nian iha Sorumutu Funsionarius Importantes ASEAN tinan 2026 (ASEAN SOM) nian neebe sei halao iha loron 28 fulan Janeiru tinan 2026.
Iha Retiru Ministrus Negosius Estranjeirus ASEAN (AMM Retreat) nian, ho tema “Lao Hamutuk ba Ita-nia Futuru”, neebe ajenda ba loron 29 fulan-Janeiru tinan 2026, sorumutu rua nee halao iha Cebu, Filipina.
“Aprezentasaun nee foka ba tema prinsipal sira neebe sei diskuti iha sorumutu sira neebe temi ona, ho destaka ba prioridade sira husi Prezidensia ASEAN Filipinas nian ba tinan 2026, akompania ba desizaun sira husi Simeiras ASEAN foin lalais nee no analize husi relasoins externas organizasaun nian, no mos kestaun rejional no internasional sira neebe fo impaktu ba dame, seguransa no estabilidade rejional,” haktuir nota komunikadu neebe STL asesu husi Governu iha Kuarta (21/01/2026).
Kona-ba Timor Leste sublina katak, enkontru sira nee importante tebes iha kontestu pos-adezaun, hodi marka tranzisaun ba partisipasaun ida neebe plena no ativa iha ASEAN nia laran. Destaka mos kompromisu atu garante integrasaun armonioza, liuhusi hametin koordenasaun institusional, prepara mekanizmu nasional sira no envolvimentu konstrutivu iha prosesu neebe relasiona ho politika no seguransa, nomos ho diplomasia organizasaun rejional nian.
(alb)
