SINGAPURA, STLTIMORLESTE.com – Prezidente Republika (PR), Jose Ramos Horta hasoru malu ho reprezentante National University of Singapore Society (NUSS) Graduate Alumni hodi esplora oportunidade investimentu nia.
Bainhira fila husi Forum Ekonomiku Mundial iha Davos mai Singapura Prezidente Republika Jose Ramos Horta ho hasoru malu ho reprezentante National University of Singapore Society (NUSS) Graduate Alumni iha Aeroporto Singapura Domingu (25/01/2026), iha hasoru malu, Prezidente foka ba projetu infraestrutura estratejiku sira hanesan Portu Baía Tibar no fo detalle kona-ba potensial ba investimentu signifikativu iha setor konstrusaun naval no enerjia solar.
Aleinde nee Tong Hsien-Hui, Prezidente NUSS no Diretor Ezekutivu Investimentu iha SG Innovate kompania ida neebe governu apoia no espesializada iha startup teknolojia nian hamutuk ho membru konsellu, Yi Da Soh.
Dialogu nee fo oportunidade atu liga ho rede alumni graduadu boot liu iha Singapura, neebe iha membru influente liu 21.000 iha setor publiku no privadu.
Durante sesaun nee, Prezidente Ramos-Horta aprezenta rezumu ida neebe kompreensivu kona-ba klima negosiu neebe pozitivu no oportunidade ekonomika foun sira iha Timor Leste.
Prezidente foka ba projetu infraestrutura estratejiku sira hanesan Portu Baía Tibar no fo detalle kona-ba potensial ba investimentu signifikativu iha setor konstrusaun naval no enerjia solar. Aprezentasaun nee ho objetivu atu pozisiona Timor-Leste nuudar destinasaun atrativu ba investidor rejional sira neebe buka kreximetu sustentavel no kolaborasaun teknolojika iha Sudeste Aziatiku.
Reprezentante NUSS sira hatudu interese boot ba aprezentasaun Prezidente nian, neebe rezultadu mak planu ba delegasaun sosiedade nian atu vizita Timor Leste iha fulan-marsu ka fulan Maiu 2026 hodi esplora liutan oportunidade parseria nian.
Aleinde iha hasoru malu nee Prezidente simu konvite ofisial atu partisipa nuudar orador prinsipal iha konferensia ida iha Singapura iha futuru.
Envolvementu nee reafirma atensaun internasional neebe boot ba dezenvolvimentu ekonomiku Timor Leste nian no refleta nasaun ninia kompromisu atu harii aliansa estratejika iha teknolojia no infraestrutura hodi dudu diversifikasaun ekonomika.
(eme)
