DILI, STLTIMORLESTE.com – Emprezariu Timor Oan, Domingos da Costa hatete, razaun governu uza osan emprestimu hodi halo dezenvolvimentu iha rai laran nee, tanba osan emprestimu nia funan kiik duke Timor Leste (TL) nia osan neebe rai iha banku fo emprestimu ba ema ho funan boot.
“Ita garante katak osan emprestimu nee sei la lori tusan ba jerasaun foun sira, tanba osan nia funan kiik tebes no la boot hanesan ita nia osan, neebe tau iha banku fo emprestimu ba ema seluk nee,” dehan Domingos ba STL, iha Kolmera, Dili, Sabadu (24/01/2025).
Osan emprestimu tuir nia tetu ba tempu naruk nee diak, tanba osan emprestimu nee nia funan kiik liu osan TL nian neebe rai hela iha banku.
“Ita nia governu hakarak uza osan emprestimu nee tanba nia funan kiik liu fali ita nia osan neebe rai iha banku, tanba ita nia osan neebe rai iha banku fo impresta ba ema nia funan boot liu fali osan imprestimu nee,” hatete Domingos.
Domingos afirma, agora dadauk montante osan husi emprestimu nee sei razuavel hela no ajuda TL atu labele tau todan ba orsamentu neebe iha.
Iha parte ketak, Akademista UNDIL,Joao Boavida hatete, bainhira governu buka deve ka empresta osan husi doadores sira, ninia impaktu mak sei tau todan ba jerasaun foun, tanba tusan kontinua aumenta.
Tanba tuir nia loloos nee la presiza uza osan emprestimu, uza deit osan neebe TL iha, maibe tanba kestaun no planu neebe ladiak, TL kontinua uza osan imprestimu husi doadores sira.
Maibe agora governu halo tan emprestimu, tusan kontinua aumenta no aban bain rua jerasaun foun sira mai hein selu mak tusan deit.
(car)
