DILI, STLTIMORLESTE.com – Deputadu Bankada Partidu KHUNTO, Luis Roberto preokupa ho intensaun kona-ba alterasaun daruak ba Lei n. 3/2004, loron 14 fulan-Abril, kona ba Partidus Politikus (PARPOL) tanba ho intensaun atu taka Partidu KHUNTO.
Kestaun nee hatoo husi Deputadu Luis Roberto liu husi plenaria Parlamentu Nasional (PN), Dili, Segunda (26/01/2026).
“Hau hakarak hatete katak foin daudaun Konselhu Ministru aprova alterasaun ba lei partidu politiku, lei numeru 3/200, iha media sosial nee, hau bele dehan katak hotu-hotu halo intervensaun halai hotu ba Partidu KHUNTO, seolah-olah Partidu KHUNTO nee hanesan arte marsiais,” preokupa Deputadu Luis Roberto.
Deputadu Luis dehan, Partidu KHUNTO ninia estatutu neebe rejistu iha tribunal la hakerek kona ba tuku malu no tebe malu, maibe hakerek tuir regras neebe konstituisaun haruka hanesan ho partidu seluk nian.
Tan nee nia husu ba milintante Partidu CNRT neebe helik aan iha pajina facebook CNRT Media Center no pajina facebook husi partidu sira seluk atu labele halo interpretasaun oin-oin ba partidu KHUNTO.
“Neebe ita lalika intrepreta sala, liu-liu media Center sira husi Partidu CNRT no partidu lubuk ida neebe hau akompanha,” dehan nia.
Deputadu Luis mos preokupa ho estrutura husi partidu balun neebe tun ba baze halo konsolidasaun hatete katak iha tinan 2028 Partidu KHUNTO lulun biti.
“Maibe lulun biti nee so nia nain mak lulun, ba ema seluk nee seidauk lulun mak nee. KHUNTO sei ba oin nafatin, metin nafatin, tanba nee hau husu ba militante no simpatizamente sira husi Partidu KHUNTO nian lalika nakadoko ho isu politiku baratu sira nee,” dehan nia.
Hatan ba kestaun nee, Prezidente Parlamentu Nasional (PPN) Maria Fernanda Lay husu Deputadu Bankada KHUNTO Luis Roberto lalika preokupa ho informasaun sira publika iha media sosial, tanba Parlamentu Nasional seidauk simu alterasaun ba lei partidu politiku nee husi governu.
“ID iha media sosial nee husik ba, lei nee mai ita mak halo senhor deputadu Luis Roberto. Husik ba, hau deit seidauk hatene saida mak altera, neebe bainhira governu haruka ona mai Parlamentu Nasional sei hatun ba komisoens, mai ita hotu tau matan iha lei nee saida mak atu altera,” hatan PPN Maria Fernanda Lay.
Entretantu, molok iha loron 14 Janeiru 2026, governu liu husi reuniaun Konselhu Ministrus aprova projetu Proposta Lei neebe aprezenta husi Ministru Administrasaun Estatal, Tomás do Rosário Cabral, kona-ba alterasaun daruak ba Lei n. 3/2004, loron 14 fulan Abril, Lei sobre Partidus Politikus.
Inisiativa lejizlativa nee ho objetivu atu hametin natureza demokratika interna partidus politikus nian no prevene ligasaun naran partidu politiku sira nian ho naran organizasaun rezistensia nian.
(alb)
