DILI, STLTIMORLESTE.com – Prezidente Komisaun F neebe trata asuntu Saude, Seguransa Sosial no Igualidade Jeneru iha Parlamentu Nasional (PN), Deputada Maria Bareto preokupa ho doutor espesialista ida ho inisial JA neebe halo atendimentu ladun diak ba pasiente ida neebe sofre moras kankru no ikus tenki lakon vida iha Hospital Nasional Guido Valadares (HNGV) Dili.
Deputada Maria Bareto hateten, pasiente ho naran Noel Sores Perreira ho idade 22 enfrenta moras kankru Leukimia, husu atu halo tratamentu tanba tuir doutor sira iha Singapura katak pasiente nee tenki ba halo tratamentu lalais.
Tuir nia, desde fulan novembru 2025 pasiente nee husu ona ba doutor espesialista ida neebe mak fo tratamentu ida ba nia, no fim iha loron 8 Janeiru, doutor nee husu pasiente nee tenki baixa iha iha HNGV Dili.
Nia dehan, durante pasiente nee baixa iha HNGV, pasiente nee husu atu baixa iha sala internamentu mane nia ka ba iha Lahane, tanba desizaun governu nian katak moras kankru baixa iha Ospital Lahane.
Maibe doutor espesialista nee husu atu pasiente nee baixa deit iha sala VIP ho razaun katak se baixa iha Ospital Lahane ka internamentu mane nia mak doutor nee sei la ba hare atendimentu ba pasiente nee no obriga pasiente nee tenki baixa sala VIP.
“Pasiente ezije para husu junta mediku maibe doutor nee la fo, ho razaun tanba dehan katak tenki iha familia neebe mak ema bot, ba husu para sira pronto para ajuda hau bele halo junta mediku, ida nee situasaun neebe mak pasiente hasoru,” hatete nia liu husi plenaria Parlamentu Nasional, Dili, Segunda (26/01/2026)
Nia hatutan, durante iha sala VIP, doutor nee rasik mak ba identifika no halo rejistu nunee pasiente bele baixa iha neeba, durante pasiente baixa iha ospital iha sala VIP hahu husi loron 8 Janeiru no foin loron 12 Janeiru mak nia foin fo atendimentu ba pasiente nee.
Nia reforsa, durante iha sala VIP, doutor espesialista ho inisial JA fo deit mak aimoruk toba nia, no mos seluk mak sonamofin, no sonamofin hahu husi 2CC, 5CC, kada oras hat nia laran tenki sona morfin 5CC no ikus liu sona 10 CC ba iha pasiente ida neebe mak ho idade 22.
Maibe iha loron 21 Janeiru lokraik, doutor sira neebe mak tama servisu iha oras kalan hasoru situasaun ida nee no informa ba doutor JA para bele foti asaun lalais maibe doutor nee la foti asaun lalais mai hirus fila fali pasiente no ninia familia nu fim iha loron 22 Janeiru madruga pasiente nee lakon vida.
“Situasaun ida nee hau foti tanba saida, ida nee ita bele konsidera katak erru neebe mak doutor foti hodi afeita ba iha Vitima nee, tanba nee hau husu Ministeriu Saude atu foti asaun investigasaun ba iha doutor refere tanba se ita la foti ho seriedade buat hotu-hotu todan sei ba governu,” adianta nia
Nia mos hatutan, husi kazu nee bele identifika realidade katak, failansu nee mai husi doutor espesialista sira neebe mak trata asuntu nee, liu-liu ba doutor espesialista ho inisial JA nee nia mak pendente ema moras kankru no ikus ema tenki mate tanba failansu neebe mak nia halo.
Hatan ba kestaun nee Prezidenti Parlamentu Nasional (PPN) Maria Fernanda Lay hateten, Vise Ministru asuntu parlamentares labele partisipa iha reuniaun plenaria tan nee nia husu tekniku sira husi Vise Ministru atu rezistu hotu preokupasaun deputadu sira.
“Ohin Vise Ministru la marka prezensa iha nein iha substituisaun neebe tekniku sira iha halo favor deputadu sira kolia ba mak sira rezista aprezenta ba vise ministru hodi enkamina ba membru goveru relevante bele tau atensaun ba preokupasaun sira nee,” hatete Maria Fernanda Lay.
(alb)
