DILI, STLTIMORLESTE.com – Reprezentante povu iha Parlamentu Nasional preokupa joven sira neebe ikus-ikus nee kontinua kria konfrontu hasoru grupu seluk. Tanba aktu la diak no la kontribui ba estabilidade nasaun nia.
Prezidente Komisaun B trata asuntu Negosiu Estranjeiru no Defeza Seguransa, Deputadu Domingos Augosto Deker informa, nia parte lamenta ho joven sira-nia asaun sempre kria konfrontu iha rai-laran, liuliu foin lalais konfrontu ida akontese iha Tibar nian.
“Hau-nia parte la mentabel tebes ho aktu sira hanesan nee, Tibar nee fatin ida konsideradu risku mos, ikus-ikus nee ita haree hakmatek mais uluk joven sira iha neebe kuandu joven ruma provoka sempre hetan reasaun no hau rasik mos iha 1 janeiru 2023 sai hanesan vitima neebe hetan asaltu husi joven sira iha neeba”, hatete Deputadu Deker ba Jornalista sira iha resintu PN, Dili, Tersa (27/01/2026).
Nia hateten, nia parte la jeneraliza katak konfrontu nee akontese husi grupu arte marsiais sira, maibe lamentabel ho asaun nee tanba nee nia hanesan komisaun responsabiliza ba area defeza no seguransa alerta mos ba joven sira lalika organiza malu grupu-grupu pois hasoru grupu seluk nee atetude neebe la diak no laiha benefisiu ba Timor.
Nia mos husu ba joven sira labele ezije governu atu reativa atividade arte marsiais sira hodi aproveta atu kria forsa hodi halo problema, tanba se ida kontinua Parlamentu no governu sei kria lei ida rigor hodi regula.
“Hanoin katak governu nia esforsu atu reativa organizasaun sira hanesan nee joven sira mos tenke konsiente ita-nia direitu mak atu ezije, maibe la bele haluha ita-nia dever atu responsabiliza, la bele haluha atu asumi ita-nia responsabildiade nuudar ita-nia dever”.
Nia afirma, joven tenke aproveta ho grupu ka organizasaun atu motiva ida-idak nia an sai ema diak iha futuru laos ba halo flai problema ba maluk seluk.
“Ita husu atu organiza an iha grupu, iha organizasaun ka arte nee ita-nia direitu maibe la bele haluha atu asumi ita-nai responsabilidade hanesan sidadaun moris iha nasaun ida nee.laos ba aproveta atividade sira nee paradepois kria fali konfrontu ho grupu seluk nee ladun diak,” dehan nia.
Reprezentante povu preokupa katak, problema ida seidauk hotu agora ida komesa mosu tan, se hanesan nee iha nesesidade saida reativa grupu hirak nee atu halo saida, tanba reativa grupu atu aproveta fali kria forsa konfrotu hasoru fali ema seluk, ida nee nia parte hanesan reprezentante povu la aseita.
Deputadu Deker mos preokupa ho konfrontu neebe akontese iha Tibar tanba motivu klean husi problema nee kona ba saida Polisia Nasional Timor Leste halo ona investigasaun atu hatene loloos motivu husi problema nee.
Iha fatin hanesan, Prezidente Komisaun A trata asuntu Konstitusional no Justisa, Deputadu Natalino dos Santos katak konfrontu neebe akontese iha Tibar la bele jeneraliza katak nee husi grupu arte marsiais sira maibe ema neebe komete aktu nee nia iha responsabilidade tuir lei iha ona.
“Hau sente katak dalaruma ita generaliza situasaun, asidente iha Tibar nee ema ho ema konfrontu nee prosesu krime no ema halo problema nee nia sei ba responsabiliza nia aktu,” dehan nia.
(alb)
