DILI, STLTIMORLESTE.com – Prezidente Republika (PR ), Jose Ramos Horta simu Primeiru Ministru Australia Anthony Albanese iha Palasiu Prezidensial hodi hametin parseria diplomatika rai rua.
Prezidente Republika Timor Leste, Jose Ramos Horta, iha loron Kuarta nee (28/01/2026), simu Enkontru Kortezia ho Onoravel Primeiru Ministru Australia, Anthony Albanese, MP, iha Palasiu Prezidensial, Díli. Enkontru nee sai parte husi esforsu kontinuidade hodi hametin relasaun diplomatika, parderia estratejika no amizade istorika entre Timor-Leste ho Australia.
Programa enkontru ohin hahu iha tuku 11.30 dader, simu ho seremonia simu ofisial, inklui Guarda de Onra iha dalan protokolu Palasiu Presidensial, hodi presta onra boot ba vizita Primeiru-Ministru Australia nian.
Hafoin nee, halao aprezentasaun ba delegasaun sira, sei iha asina livru konvidadu no sesaun foto ofisial iha Salaun ASEAN.
Depois lider nain rua halao enkontru restritu (tete-a-tete) iha Gabinete Prezidente nian, hodi diskute asuntu estratejiku sira neebe relasiona ho koperasaun bilateral, desenvolvimentu sustentavel, seguransa rejional no parsería iha area edukasaun, ekonomia no mudansa klimatika.
Tuir mai, enkontru kortezia kontinua iha Salaun Prezidente Nicolau Lobato, ho partisipasaun delegasaun rua nian.
Iha momentu nee, halao troka Prezente ofisial, foto hamutuk no deklarasaun Simbolíka (Meet the Press) hodi reafirma komitmentu Líder nai-2 ba relasaun amizade entre Nasaun Rua.
Programa remata ho partida Onoravel Primeiru-Ministru Australia husi Palasiu Prezidensial, marka enkontru diplomatiku (aenkontru Bilateral) ida neebe importante no estratejiku ba futuru relasaun entre Timor Leste no Australia.
(eme)
