DILI, STLTIMORLESTE.com – Primeiru Ministru (PM), Kay Rala Xanana Gusmão ho Ministra Finansa, Santina Cardoso fo pose ba Nicodemos dos Reis Pereira, hodi asumi kargu nuudar Komisariu Autoridade Tributaria ba periodu 2026-2029.
Serimonia tomada pose nee halao iha Auditorium Kay Rala Xanana Gusmão, Ministeriu Finansas, Aitarak Laran, Kinta (29/1/2026).
PM Xanana liu husi diskursu husu ba Komisariu foun atu halao knaar ho responsabilidade no integridade, liuliu iha jestaun rekursu ho diak, hodi garante futuru diak ba nasaun.
“Tanba ita koalia kona-ba konstrusaun la fasil. Ita atu hetan ukun-an, funu lori tinan 24, sira neebe mate la husu buat barak, sira hakarak husu rai nee ukun-an atu povu hetan moris diak nuudar rai independente”, katak Xanana Gusmão.
Nia dehan simu knaar signifika asume mandatu ida-neebe iha responsabilidade boot no hetan konfiansa publika, hodi garante Timor-Leste nia susesu ba futuru. “Ita-nia esforsu mak susesu ba jerasaun foun sira. Bainhira funsionariu sira halo serbisu ho diak, nia benefisiu nee ba povu”, dehan Xanana.
Xefe Governu afirma katak knaar neebe hetan nee uza ho responsabilidade, tanba iha 20 Maiu agora Timor-Leste komemora tinan 24 independensia. “Hateke ba kotuk too mai agora tinan 24 ita ukun-an, ita halo ona saida, no hadia ona saida, povu hetan moris diak ona ka lae, ita lao too iha neebe? Atu buat sira nee bele akontese, sistema tenke lao diak, tanba sistema la ladiak, susar tebes”, tenik Xanana.
Xanana hatete katak Timor-Leste iha Fundu Petroliferu, kompara ho nasaun sira seluk laiha no kada tinan lolo-liman husu apoiu. “Agora ita tenke foti desizaun neebe diak atu hametin ita-nia independensia nee. Lae ema seluk mai aproveita ita. Hametin ita-nia independensia mak finansia ba ita-nia prioridade sira neebe ita harii ona nuudar Estadu, tanba ita-nia rikeza petroliferu fo ona oportunidade ba dezenvolvimentu nian”, nia dehan.
Entretantu, Ministra Finansa, Santina Cardoso hateten katak tomada pose ba Komisariu Autoridade Tributaria foun bele fo liutan knaar ba autoridade no ekipa tomak, atu halao nia funsaun sira iha area neebe estratejika.
“Benvidu ba Nicodemos neebe filafali mai hamutuk ho ekipa tomak Autoridade Tributaria nian no mos Ministeriu Finansa nia direjente tomak. Ita-boot sira maka hau nia forsa. Hau so bele susesu bainhira ita bele forte no serbisu hamutuk, liuliu ho Nicodemos mai hamutuk ho ita, bele halo mudansa”, tenik Santina.
Komisariu Autoridade Tributaria foun, Nicodemos dos Reis Pereira, hateten katak funsionariu sira husi Autoridade Tributaria no Ministeriu Finansa iha kompromisu komun atu hametin misaun kona-ba Administrasaun Tributaria Timor-Leste nian, hodi administra no hasae reseita tributaria ho maneira neebe responsavel no transparente tuir lei no regulamentu aplikavel.
Nia dehan prinsipiu ida-nee aliña ho politika Governu no ajenda reforma fiskal no institusional, liuliu mellora adminstrasaun no sistema tributaria hodi hadia prestasaun servisu publiku ba kontribuinte sira ho justu, efisiente no efikaz.
“Aproveita oportunidade kmanek ida-nee, hau hakarak agradese ba Ministra Finansa, Santina Viegas Cardoso, ba konviksaun no konfiansa neebe depozita ona mai hau atu lidera Autoridade Tributaria. Agradese uain liutan ba Primeiru-Ministru, Xanana Gusmão, ba ninia apoiu”, nia realsa.
Ministra Finansa, Santina Cardoso, aprezenta proposta ba Konsellu Ministru delibera hodi nomeia Nicodemos dos Reis Pereira nuudar Komisariu Autoridade Tributaria, ho konsiderasaun ba ninia kapasidade teknika neebe hetan rekoñesimentu no esperiensia profisional neebe hatudu ona.
Tanba nee, agora dadaun 24 anos Timor halao knaar ukun aan nee, tanba hatene buka kuriji ikus mai dezenvolvimentu lao diak, labarik sira sei lembra katak ida nee Timoroan sira nia esforsu.
(joa)
