DILI, STLTIMORLESTE.com – Jurista Timoroan konsidera katak, Juiz Timoroan iha kapasidade atu tur iha Supremu Tribunal Justisa (STJ).
“Juiz Timoroan lubuk ida mak prienxe kriteria no iha ona kapasidade atu tur iha STJ, maibe nee tenki liu husi prosesu rekrutamentu para bele valida sira nia nomeasaun,” dehan Jurista Sergio Dias Quintas ba STL Sabadu (31/01/2026).
Nia hatutan, estabelese STJ nee kabe ba kompetensia kbiit estadu nian, oinsa mak membru komisaun neebe tur hodi hili Juiz STJ sira devia ema sira neebe iha kredibilidade, integridade no imparsialidade, tanba durante nota katak ema sira neebe hili ona husi orgaun soberania estadu la hatudu kriteria sira nee.
Maibe haree liu ba interese politiku nee sai preokupasaun ida no bele afeta mos ba komisaun nee nia imparsialidade.
Iha fatin ketak, Akademiku UNTL, Rafael de Jesus dehan, husu komisaun atu kria regra neebe rigor.
“Hanoin ekipa neebe iha kria regulamentu neebe rigor.atu autor judisiariu neebe sei ba tur iha STJ tenke iha kapasidade diak atu labele hamosu duvidas iha sosiedade,” dehan nia.
Nia dehan, espera katak Juiz sira neebe sei ba tuir iha STJ iha kapasidade neebe diak atu halao knaar, liu-liu atu lori justisa lao ba oin.
Aleinde nee Komisariu Pedro Camoes katak, depois Prezidente Repúblika Publika hili tiha sira nia nia naran, husi fulan Janeiru loron 9 tinan 2026 nee, komisaun halo kedan nia servisu.
“Ami halo ona servisu no aprova ona ami nia rejimentu internu depois dokumentus sira oinsa atu avalia ba futuru preparasaun atu simu ekipa juri no diskute ba materia sira neebe mak oinsa halo avaliasaun ba futuru kandidatu Juiz sira. Reuniaun nee ami halo dala hira ona, ami reuniaun tan no rejimentu aprova tiha ona, no proposta ruma husi komisariu sira mai ami diskute depois mak ami aprova,” dehan Pedro Camões.
Nia hatutan, komisaun ba rekrutamentu nee kompostu husi ema nain tolu neebe nain ida husi Prezidente Repúblika mak nomea, no ema nain rua Parlamentu Nasional mak nomea.
(ter)
