DILI, STLTIMORLESTE.com – Prezidente Republika (PR) Jose Ramos Horta hasoru malu ho Ali Alsaloom, hanesan Konsultor Kultural Proeminente, CEO Maestro Group, hodi diskute papel vital diplomasia no kultural iha Abu Dhabi.
Iha hasoru malu nee, Prezidente Ramos Horta esplora dialogu kultural no empoderamentu joven sira nian ho espertu konhesidu Ali Alsaloom no kriador ba programa viajen neebe manan Premiu Duroob.
Tuir komunikadu neebe STL asesu husi Media PR, Kuarta (04/02/2026) hatete, iha sorumutu nee Prezidente no Alsaloom diskute kona-ba papel vital diplomasia kultural nian no konta istoria kreativa hodi fustera komprensaun global.
Nuudar Laureadu Premiu Nobel ba Dame neebe dedika an ba prinsÃpiu fraternidade umana nian, Prezidente Ramos-Horta hatoo apresiasaun boot ba Alsaloom nia servisu hodi kria ponte ba divizaun kultural sira, hodi nota katak inisiativa sira hanesan nee esensial tebes hodi harii mundu ida neebe nakonu ho kompaixaun no ligadu ba malu.
Diskusaun nee mos foka ba empoderamentu joven sira-nian no kbiit husi perseveransa, bazeia ba Alsaloom nia jornada tinan ruanulu nian nuudar orador transformasional no autor ba serie “Ask Ali”.
Prezidente Ramos Horta fo destake katak Ali nia istoria transformasaun karrera no ninia dedikasaun ba advokasia kultural, sai nuudar inspirasaun forte ida ba joven sira iha Timor Leste.
Liu husi ligasaun ho lian global sira neebe influente hanesan Alsaloom, Prezidente iha objetivu atu esplora dalan foun sira hodi promove identidade nasional Timor-Leste nian, enkuantu foti mos valor universal sira husi dialogu no respeitu mutuu iha kuintal internasional.
(eme)
