DILI, STLTIMORLESTE.com – Prezidente Republika (PR) Jose Ramos Horta hasoru malu ho Sekretariu Jeral (SekJer) Fraternidade Umana Mohamed Abdelsalam, ho objetivu hametin ligasaun global.
Prezidente Republika Jose Ramos Horta hasoru malu iha Abu Dhabi ho Juiz Mohamed Abdelsalam, Sekretariu Jeral ba Premiu Zayed ba Fraternidade Umana, hodi diskute misaun global neebe lao hela hodi fustera dame no komprensaun mutua.
Iha sorumutu nee, Juiz Abdelsalam hatoo Papa Francisco nia domin boot ba Timor Leste, hodi nota katak Santu Padre kontinua fo valor aas ba nasaun nee hafoin ninia interese misionariu sira iha rejiaun nee.
Sekretariu Jeral mos louva Prezidente Ramos Horta nuudar kampeaun pas nian neebe firme, hodi hatudu ninia orgullu boot ba Prezidente nia envolvimentu kontínua iha inisiativa internasional Fraternidade Umana nian no ninia kompromisu neebe metin ba prinsípiu umanitariu sira.
Juiz Abdelsalam fahe mos ninia diskusaun foin lalais nee ho Prezidente Azerbaijão, neebe nia enkoraja tebes atu vizita Timor-Leste, hodi deklara katak nee mak nasaun ida neebe “interesante liu” (exciting) iha Sudeste Aziatiku.
Aleinde nee, Sekretariu Jeral husu ba Prezidente atu koalia mos kona-ba importansia relasaun global neebe konstrutivu durante ninia sesaun sira neebe sei mai, hodi foti susesu Emiradu Arabe Unidu nian nuudar modelu dezenvolvimentu neebe fustera kooperasaun internasional.
Prezidente Ramos Horta estende konvite formal ida ba Juiz Abdelsalam atu vizita Timor Leste iha loron 20 Agostu 2026. Vizita nee planeia ona atu koinside ho eventu boot ida neebe Prezidente sei halao ho Laureadu Nobel sira seluk, ho objetivu atu promove liutan valor sira husi Dokumentu kona-ba Fraternidade Umana.
Sekretariu Jeral simu kedas konvite nee no reafirma ninia kompromisu hodi apoia Timor Leste nia papel pioneiru nuudar advogadu global ba kompaixaun, dialogu, no solidariedade internasional.
(eme)
