DILI, STLTIMORLESTE.com – Prezidensia Republika fahe sertifikadu rekonhesimentu ba ekipa husi Institutu Gestaun Ekipamentus no Apoiu Dezenvolvimentu Infraestrutura (IGEADI) no funsionariu palasiu, inklui media nasional sira neebe halao servisu iha selebrasaun tinan 50 FALINTIL-Forsa Defeza Timor Leste (F-FDTL) iha Turiskai Binani.
Sertifikadu rekonhesimentu nee entrega direita husi Xefe Kaza Sivil Prezidensia Republika, Jesuina Maria Ferreira Gomes no Asesor Prinsipal iha area Politika Prezidente Republika, Jeneral Reformado Lere Anan Timur.
Bainhira remata fahe sertifikadu, Asesor Prinsipal iha area Politika Prezidente Republika, Jeneral Reformado Lere Anan Timur ba jornalista sira iha Palasiu Prezidensial Nicolau Lobato, Dili, Kinta (05/02/2026) hatete, ohin realiza serimonia ida hodi fahe sertifikadu rekonhesimentu ba ekipa husi IGEADI nomos ekipa seluk neebe halao servisu iha loron importante tinan 50 F-FDTL iha Turiskai Binani.
“Ohin ami halo serimonia kiik oan ida iha nee fahe sertifikadu ba maluk sira neebe uluk servisu hamutuk ho Prezidensia ba 20 Agostu 2025 iha Binani Osnako, hanoin hanesan ema ita sempre rekonhese fo louvour ba sira neebe halo diak no ita kritika ema neebe halo sala, entaun ohin ami halo serimonia oan ida iha nee hodi fahe sertifikadu ba ministeriu sira neebe que hola parte ba prosesu reablitasaun dalan husi turiskai ba Binani,” dehan Asesor.
Asesor PR Lere dehan, reablitasaun estrada laos fasil, tanba dalan nee kareta labele liu no rai mos laos tetuk, maibe foho, Prezidensia fo tempu fulan ida deit ba IGEADI hahu husi Julhu too 20 Agostu, maibe antes 20 Agostu dalan diak ona, sira halo esforsu tomak.
“Ita ba iha terenu haree nee laos fasil rai monu rai klean dalan laiha, maibe antes dia 20 estrada husi turiskai ba Binani diak no husi 20 Agostu, Prezidente Republika ba halo serimonia iha Binani,” dehan Lere.
Nia dehan, husi sira nia esforsu no sakrifisiu no pasiensia, sira nia obidiensia hotu neebe mak sira halo nunee Prezidensia rekonhese fo hodi sertifikadu rekonhesimentu.
Iha fatin hanesan, Prezidente IGEADI, Ana Paula da Cruz hatutan, orgulhu boot hanesan Timoroan halo servisu ikus hetan rekonhesimentu husi Prezidente Republika Jose Ramos Horta.
“Ohin nee oportunidade diak ida husi IGEADI, mai simu sertifikadu ida hodi haree ba servisu neebe halo antes nee todan tebes, ami mos hatene katak fatin nee difisil tebes atu too ba, entaun ami tenke aranja operador hirak neebe iha kualidade diak no operador neebe barani tabele iha foho lolon sira nee,” katak Prezidente IGEADI nee.
Nia hatete, durante nee sira iha preparasaun duni ho diak para hodi suporta serbisu Prezidente nia programa hirak nee, no ikus hetan duni rezultadu neebe diak.
(eme)
