DILI, STLTIMORLESTE.com – Prezidente Republika (PR) Jose Ramos Horta hamutuk ho lider mundial sira, partisipa abertura Human Fraternity Majlis iha Abu Dhabi.
Prezidente Republika Jose Ramos Horta tuir serimonia abertura ba Human Fraternity Majlis nee iha Museu Nasional Zayed neebe foin inaugura iha Abu Dhabi. Nuudar parte hosi International Zayed Award for Human Fraternity ba dala 3.
Eventu nee halibur lider mundial, formulador politika, no espesialista umanitariu sira durante vizita ofisial Prezidente nian ba Emirados Arabes Unidos.
Tuir Komunikadu neebe STL asesu Kinta (05/02/2026) hatete, enkontru nee sai hanesan plataforma global prestijiozu ida ba dialogu neebe foku ba rezolve dezafiu global kontemporaneu sira no harii dalan sustentavel ba dame.
Edisaun tinan nee nian iha signifikadu istoriku neebe boot, tanba nee mak eventu prinsipal primeiru neebe halao iha museu neebe dedika ba legadu Sheikh Zayed bin Sultan Al Nahyan, fundador UAE nian. Durante serimonia nee, Juiz Mohamed Abdelsalam, Sekretariu Jeral husi Zayed Award, enfatiza misaun Majlis nian atu transforma valor solidariedade no koesistensia ba asaun konkreta sira hodi kontra divizaun no konflitu.
Eventu nee mos komemora Loron Internasional ba Fraternidade Umana, hodi onra enkontru istoriku iha 2019 entre Papa Francisco no Aman Boot Al-Azhar.
Pontu sentral husi sesaun inaugural mak papel Lideransa Feto iha fuan hosi Fraternidade Umana, neebe involve figura global influente sira inklui eis-Prezidente Indonezia Megawati Soekarnoputri no Primeiru Dama Internasional balu.
Diskusaun nee foku ba papel esensial feto nian iha hametin koezaun sosial no promove Fraternidade Umana iha mundu tomak. Liuhosi partisipasaun iha forum altu nível nee, Prezidente Ramos Horta reafirma tan fali Timor-Leste nia kompromisu ba valor universal sira, kona-ba respeitu mutua no kooperasaun global.
(eme)
