BAUKAU, STLTIMORLESTE.com – Vise Primeiru Ministru, Mariano Assanami Sabino hamutuk ho Ministru Komersiu no Industria (MKI), Prezidente Autoridade Munisipiu Baukau, ofisialmente lansa ona fatuk dahuluk ba projetu konstrusaun merkadu Munisipal Baukau, iha Tuanau, Munisipiu Baukau.
Projetu konstrusaun merkadu Munisipal ho tema, merkadu foun no oportunidade foun ba dezenvolvimentu ekonomia lokal.
Tuir dezenhu ba konstrusaun merkadu refere neebe STL iha, konstrusaun nee sei kompleta uma ba negosiante sira, iha estrada diresaun tama sai, portaun 4 ho fatin seguransa, terminal, fatin parajem ba kompradores inklui jardim neebe tuir planu sei utiliza rai hektares 3.
Merkadu Munisipal Baukau neebe atu konstrui, Governu aloka liu husi fundu infraestrutura hamutuk US$ 7.139,218,43 implementa liu husi kontraktor Fujian Yongtai Constraction Group Co.Lda joint venture ho Suhurama Developer, Unipessoal Lda ho numeru kontratu 182/MCI-2024 ho durasaun servisu tinan 2.
Konstrusaun merkadu Munisipal Baukau nee bainhira finaliza iha tinan 2 tuir mai, sei fo benefisiu ba vendedores sira neebe antes nee Autoridade Munisipiu Baukau liu husi Jestaun Merkadu Munisipal Baukau rejistu hamutuk 879 relata ona iha STL.
Husi numeru vendedores nee kompostu tipu negosiu obralan 148, roupa loja 125, faan sapatu 87, sembako 146, sasan dapur 54, kolisaun 10, alfayate 14, faan sana rai 3, Tais Timor 7, faan telefone 15, baber shop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba agrikultura nian 1, darmasia 1, faan naan karun no seluk tan 10, faan ikan 23, produtu lokal 200 no iha mini restorante 7.
Iha seremonia lansamentu nee hetan partisipasaun masimu husi Autoridade Suku, Postu no entidades seluk tan neebe hetan seguransa masimu husi Komando Polisia Munisipiu Baukau.
(tom)
