DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Governu sei kria komisaun internasional ida hodi haree ba rekrutamentu ba kadetes foun Polisia Nasional Nasional Timor Leste (PNTL).
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (12/02/2026).
“Kona-ba problema rekrutamentu iha polisia sai problema boot, Palavra de Ordem neebe husi manifestante sira horiseik mos ba iha neeba, polisia gaji kiik, Xanana Koruptor, polisia gazi kiik Xanana Koruptor, neebe ami simu hotu buat sira nee hotu ho Ministeriu interior, ami haree horiseik rezolve hasai rezolusaun ida atu suspende tiha, tanba iha problema oin-oin ami mos verifika katak bele, laos problema mos haree hanesan problema, neebe suspende hodi kria komisaun ida husi polisia rasik ita nian ho polisia husi Portugal, Australia, sai komisaun internasional ida hodi haree didiak hotu sala iha neebe hodi krize, hodi bele hasai desizaun foun ka halo foun fali hodi haree katak saida mak presiza atu hadia hodi simu polisia foun, tanba 400 pesoas maibe hatama 12 mil ital la tama, la simu kedas, ho komisaun foun nee hodi monta iha ita nia rai katak kuandu iha rekrutamentu ba polisia presiza ida nee, ida nee mais halo ho los, labele hanesan baibain sira temi familiarizmu, buat sira nee hotu,” dehan Primeiru Ministru.
Primeiru Ministru hatete, komisaun neebe mak kria nee komisaun internasional inklui mos Polisia Nasional Timor Leste hodi haree kona-ba prosedur rekrutamentu ba kadetes membru Polisia Nasional Timor Leste nee ho lo-loos, nunee labele hamosu familiarizmu iha rekrutamentu.
Ho eru neebe akontese ho rekrutamentu se mak bele responsabiliza ba aktu nee, hatan ba kestaun nee Primeiru Ministru hatete “ita boot makaas liu Juiz, sira be hau temi daudaun sei kria komisaun ida atu haree ba buat sira nee hotu,” dehan PM Xanana.
Liga ho rekrutamentu PNTL agora daudaun sai polemika iha publiku, oinsa Governu nia hanoin iha Futuru labele akontese tan? Hatan ba kestaun nee Primeiru Ministru hatete, ida nee jornalista la putar otak putar kelapa.
“Hau koalia nee o tenke hanoin jornalista laos husu deit maibe putar, hau ohin dehan tanba ami simu hatene katak bele akontese problema atu forma komisaun ida mai husi Portugal husi Australia atu haree ba problema sira nee hodi evita ba ikus mai mosu problema sira nee,” katak nia.
PM Xanana dehan, buka atu labele akontese tanba nee mak iha reforma nee lae kazuais halo saida atu ba servisu, ba servisu saida, laiha arbiru deit, tanba nee mak Governu ida nee tama iha Julhu 2023 atu kurizi saida mak mosu tiha ona kurizi hodi hadia nafatin.
Aleinde nee oinsa Primeiru Ministru nia avaliasaun ba membru Governu durante mandatu tinan 3, hatan ba kestaun nee Primeiru Ministru hatete, hahu husi Primeiru Ministru rasik servisu la diak liu.
Aleinde nee Konselhu Ministrus aprova projetu Rezolusaun Governu, neebe aprezenta husi Ministru Interior, Francisco da Costa Guterres, kona-ba suspensaun temporaria no revizaun ba Konkursu Publiku Admisaun iha Kursu Formasaun ba Ajentes Polísia Nasional Timor Leste (PNTL).
Ho desizaun ida nee, Governu hakarak asegura transparensia, legalidade no kredibilidade iha prosesu rekrutamentu, hodi konsidera duvida no preokupasaun sira neebe hatoo hosi kandidatu sira no entidade oioin kona-ba kumprimentu ba rekizitu balun no regularidade iha faze konkursu nian. Ba ida-nee, Rezolusaun Governu prevee suspensaun temporaria ba konkursu no reforsa mekanizmu supervizaun no fiskalizasaun.
Desizaun nee mos determina atu halo reestruturasaun ba Komisaun Monitorizasaun no Fiskalizasaun nian, liuhusi integra membru nasional no internasional independente sira, nunee mos halo revizaun klean ba faze hotu-hotu hosi prosesu selesaun nian, ho nia objetivu atu hatene loloos faktus no potensialmente adota medidas koretivas. Ho prosedimentu ida nee, Governu iha intensaun atu hametin sidadaun sira-nia konfiansa iha instituisoins publikas no atu garante katak asesu ba Polísia Nasional Timor Leste nee halao ho justu, imparsial no tuir lei.
(eme)
