DILI, STLTIMORLESTE.com – Ministra Solidariedade Sosial no Inkluzaun (MSSI), Verónica das Dores enkoraja Movimentu Feto (MoFe) atu berani koalia kona-ba sira nia direitu, liu-liu bainhira hasoru ameasas ruma tenke berani koalia sai, nunee MSSI no entidade relevante sira bele hatene hodi buka solusaun hamutuk.
Liu husi pajina media sosial MSSI, neebe diariu nee asesu iha Kinta (12/02/2026) hatete, reprezentante MoFe husi 13 Munisípius, entrega dokumentus plataforma ba Ministra Verónica das Dores ho Visi Ministra Céu Brites. Dokumentus plataforma refere koalia kona-ba asuntu lubuk ida, maibe prinsipalmente koalia kona-ba asuntu sosiais, edukasaun no justisa. Sorumutu refere halao iha Salaun Enkontru MSSI Kaikoli, Dili, Kinta (12/02/2026).
Iha oportunidade ida nee, Ministra enkoraza MoFe atu berani koalia kona-ba sira-nia direitu, liuliu bainhira hasoru ameasas ruma, tenke berani ko’alia sai, nunee MSSI ho entidade relevante sira bele hatene hodi buka solusaun hamutuk.
Sorumutu entre MoFe ho MSSI, organiza husi Prezidente Institutu ba Defeza Direitus Labarik (INDDICA), Dinorah Granadeiro. Iha oportunidade ida ne’e, Prezidente INDDICA atualiza mos kona-ba Forum Labarik neebe MoFe halao iha tinan 2024, hodi akomula ideias, sujestaun ba pratika diak sira husi MoFe.
MoFe mak movimentu ida neebe halibur labarik feto no foinsae husi ensinu secundaria no presecundaria husi 13 Munisípius. MoFe halao ninia atividade bazeia ba Konstituisaun artigu 18, Konvensaun Direitus Labarik no Konvensaun CEDAW.
(dom)
