DILI, STLTIMORLESTE.com – Akademista sira kestiona makaas seriedade Governu nian relasiona ho kondisaun infraestrutura sidade nian neebe la funsiona. Enkuantu membru Governu sira kontinua goza ho priviléjiu kareta luxu, maibe lampu merah iha kruzamentu estratejiku barak iha kapital Dili kontinua mate permanente, kria imajen katak Governu sei “dukur naruk” ba povu nia susar.
Akademista UNTL, Jose Magno Xavier hatete, lampu merah iha kruzamentu sira hanesan Villa Verde, Kolmera no fatin seluk tan la funsiona ona durante fulan ba fulan. Situasaun nee transforma estrada kapital nian sai hanesan kampu funu ba kondutor sira neebe tenke tula fiar ba sorte hodi hakatk liu kruzamentu neebe runguranga tebes.
“Nee laos ona kestaun teknik simples, maibe nee fallhansu iha kbiit Governu nian hodi jere infraestrutura baziku. Sidade Dili sai hanesan sidade neebe laiha nain, tanba buat bazika hanesan lampu merah mos Governu dukur no la konsege hadia,” dehan Jose ba STL, iha Kaikolia, Dili, Kinta (09/04/2026).
Jose kestiona makas ba neebe mak orsamentu manutensaun neebe tinan tinan Estadu aloka milhaun ba milhaun. Lampu sira nee ohin loron sai deit hanesan ai rin enfeita sidade nian neebe la fo benefisiu ba publiku. Publiku kestiona Governu hein fali vitima mate iha estrada foin nakfilak hodi foti asaun.
“Ita sosa ekipamentu ho kualidade saida, no se mak simu projetu manutensaun sira nee, Governu tenke transparensia tanba povu nia moris mak sai testa,” kestiona Jose ho lian neebe hirus hasoru neglijensia Governu nian.
Ho situasaun ida nee Nia husu ba Governu liu husi Ministeriu relevante atu hamriik husi “dukur” laran no foti asaun imediata hodi hadia sistema sinalizasaun nee. “ Se lae, imajen sidade Dili nian kontinua monu iha vizitante estranjeiru sira nia oin no risku asidente sei kontinua sae makas,” dehan nia.
Akademista nee dehan, Governu labele subar deit iha promesa dezenvolvimentu boot nia kotuk, enkuantu kestaun baziku seguransa nian iha Governu nia vizaun oin deit mos nakukun hela. Publiku hein katak Governu bele hader lalais hodi fo solusaun antes asidente boot liu tan akontese.
Iha parte ketak Motorista, Antonio de Oliveira mos kestiona kbiit Governu nian hodi jere buat bazika hanesan nee.” Fulan ba fulan mate deit, sira (Governu) liu mos haree, maibe finje la haree, ita atu kolia dezenvolvimentu saida tan,” hatete Antonio.
Too notisias nee STL hatun, parte Governu seidauk fo resposta ofisial ruma, enkuantu povu kontinua enfrenta perigu loron-loron iha estrada klaran.
(car)
