DILI, STLTIMORLESTE.com – Prezidente Repúblika (PR), José Ramos-Horta husu Estadu atu apoia família kbiit laek hodi prevene diskriminasaun hasoru labarik feto.
Prezidente Horta hato’o pedidu ne’e liuhusi mensajen iha selebrasaun Loron Nasionál Feto, iha CCD, Dili, Sesta-feira (06/11/2026).
Nia esplika katak, família balu diskrimina labarik feto tanba limitasaun ekonómika, ne’ebé halo inan-aman sira la konsege tau matan ba oan hotu-hotu ho igualdade.
Tanba ne’e, nia husu Estadu atu fó apoiu ba família vulnerável sira, hodi garante katak labarik feto no mane hetan tratamentu hanesan.
“Estadu tenke intervén atu ajuda família kiak sira, tanba limitasaun ekonómika bele hamosu diskriminasaun entre oan mane no oan feto,” dehan Prezidente Horta.
Prezidente Horta subliña katak, garantia igualdade jéneru la’ós de’it asuntu Konstituisaun no lei, maibé presiza orsamentu atu implementa polítika sira ne’ebé apoia família kbiit laek.
Nia afirma katak, implementasaun igualdade jéneru presiza apoiu konkretu husi Estadu, liuliu ba família sira ne’ebé enfrenta difikuldade ekonómika.
Prezidente mós apela ba mane no labarik mane sira atu sai parseiru iha promosaun igualdade jéneru, respeita dignidade feto no fahe responsabilidade iha família no sosiedade.
“Igualdade jéneru la’ós responsabilidade feto sira nian de’it, maibé responsabilidade ita hotu-hotu nian,” afirma Horta.
Nia mós refere katak, lema selebrasaun Loron Nasionál Feto hatudu determinasaun feto Timor-Leste nian atu kontinua luta to’o atinje igualdade no inkluzaun.
Iha nia apelu, Prezidente Horta husu sidadaun hotu atu hametin kompromisu hamutuk hodi harii Timor-Leste ne’ebé respeita dignidade umana no garante oportunidade hanesan ba ema hotu.
Nia mós husu atu prevene violénsia doméstika no diskriminasaun, hodi permite sidadaun hotu kontribui ba progresu no prosperidade nasionál.
(eme)
