BAUKAU, STLTIMORLESTE.com – Servisu Munisipal Agrikultura Baukau orgulhu, tanba membru FALINTIL nain haat (4) atual ativu iha Instituisaun Estadu Forsa Defeza Timor Leste nafatin iha inisiativa halo natar iha Suku Seiçal, Postu Administrativu Baukau Vila, Munisipiu Baukau.
Responsavel Croop Servisu Munisipal Agrikultura Baukau, Leonor Almeida de Araujo komenta, atu krese numeru produsaun agrikola iha rai laran, laos esforsu husi parte ida, maibe kontribui husi parte hotu neebe iha inisiativa liu husi halo toos no natar, hanesan inisiativa husi grupu agrikultor Daitula neebe involve husi membru FALINTIL 24 atual ativu iha Instituisaun Estadu Forsa Defeza Timor Leste.
“Ami sente orgulhu tebe tebes tanba katuas sira nee inisiativa tebe tebes harii grupu ida nee halai natar katak, politika atu hasae produsaun iha setor agrikultura,” Responsavel Croop, Leonor Almeida de Araujo ba jornalista sira iha Seiçal, Sesta (10/04/2026).
Nia konsidera, inisiativa nee importante, tanba atu krese numeru produsaun agrikola iha Baukau, nunee Servisu Munisipal Agrikultura liu husi extrnsionista sira fo apoiu tekniku agrikultura modernu ba grupu refere.
Nia aprezenta, apoiu tekniku agrikultura modernu ba grupu refere mak hanesan fini hare nakroma kilograma 50, adubus, pestisida, fila rai inklui halo preparasaun ba viverus neebe fasil atu kuda ho makina, neebe iha faze dahuluk nee apoiu ba nafatin hektare rua ho balu.
“Agora ami prepara ba sira mak hektare 2 ho balu, maibe sira aumenta tan hektare nee depende ba sira ami nafatin fo asistensia ba sira too koilheta,” Leonor komenta.
Membru FALINTIL Manuel Soares “Maulindo” hateten, nuudar membru FALINTIL luta tinan 24 iha ai laran hasoru invazor Indonezia lori Timor too hetan ukun aan, no iha tempu ukun aan prontu atu kontribui ba nasaun tuir kapasidade liu husi halo natar.
“Agora nee hektare rua ho balu, maibe ami nia hakarak nee liu, neebe Agrikultura Baukau mai ajuda ami, maibe ami mak kuda deit karik nee problema, hanoin ami katuas ona ema ajuda ami laiha, maibe Agrikultura apoiu ami ba oin too iha rezultadu,” deha nia.
Entretantu Membru FALINTIL tinan 24 atual ativu iha Instituisaun Estadu Forsa Defeza Timor-Leste halo natar iha Suku Seiçal mak hanesan Maulindo, Farli, Carlito Somoço inklui Marciano Boulesa.
(tom)
