BAUKAU, STLTIMORLESTE.com – Dirijente Snapboost iha Munisipiu Baukau hetan atake husi membru sira, tanba razaun labele foti osan.
Membru Snapboost iha Vila Nova Baukau lakohi temi nia identidade aprezenta, Snapboost nuudar aplikasaun, katak orijen husi nasaun Amerika no utiliza iha Timor Leste liu husi Nasaun Indonezia ho maneira depozitu osan hetan osan funan kada fulan husi osan inan neebe depozitu iha Snapboost.
Nunee aplikasaun refere funsiona iha Baukau ho maneira rejistrasaun estandariza ba kada membru US$ 36.50. Husi US$ 36.50, US$ 1.50 ba Mosan, US$ 5.00 selu ba administrasaun akun Snapboost enkuantu US$ 30.00 iha akun Snapboost membru nian hodi kada loron tuir regras membru sira fo notifikasaun “gosta” dala ida ba videografika iha plataforma TikTok, Facebook, Instagram no YouTube neebe eziste iha Snapboost, neebe kada fulan hetan funan ho montante US$ 34.45 husi US$ 36.50.
Maibe iha tan promosaun Hipo husi Snapboost neebe ho maneira fo oportunidade ba kada membru depozitu US$ 30.00 hetan funan US$ 30.00, US$ 200.00 hetan funan US$ 200.00 no membru neebe depozitu US$ 5.000 hetan funan US$ 5.000. Nunee husi promosaun HIPO neebe iha halo membru sira balu depozitu too US$ 4.000 no too loron 04-06 Abril nee membru atu foti osan, maibe la konsege, nunee iha loron 10 Abril nee mosu reasaun husi membru hasoru dirijente Snapboost iha Baukau.
“Nia tunda hela deit entaun hein deit ona, mais ami la pasiensia ona, ohin nee mai husu loos informasaun tenke selu fali osan, se osan funan mak laiha, mais fo fali osan inan,” hateten membru Snapboost nee ba STL iha Vila Nova Baukau, Sesta (10/04/2026).
Nia haktuir, husi prezensa membru sira nian ba dirijente Snapboost nia rezidensia husu loos informasaun no balu husi atu devolve fali osan neebe investe ona, maibe prezensa mos husi Polisia Eskuadra Postu Baukau Vila hodi akompanha situasaun, tanba antisipa ba insidente no asidente.
Nia sublina, mezmu husi prezensa nee membru Snapboost balu nervozu hasoru dirijente Snapboost, maibe iha deklarasaun husi Snapboost ba membru sira hein rezultadu iha loron 13 Abril nee.
“Se ida nee mak liu loron neebe sira promete, entuan ami tuur hamutuk sei halo keixa lei mak termina,” Membru nee akresenta.
Nia deklara, maneira rejistu iha Snapboost mak hanesan utiliza numeru WhatsApp no Email inklui kartaun eleitoral, Bilhete Identidade no pasaporte husi membru ida idak.
Nia rekonhese, prosesu rejistu no investe osan iha Snapboost laiha karta akordu entre dirijente ho membru, maibe iha evidensia hanesan foto hamutuk, tanba nee bainhira la devolve osan refere sei aprezenta keixa ba autoridade kompetente.
Liga asuntu nee, STL tenta konfirma dirijente Snapboost iha Baukau liu husi telefone, maibe la atende.
Entretantu membru Snapboost iha Baukau hamutuk 700 resin kompostu funsionariu sira husi Banku Nasional Komersiu Timor Leste, membru Polisia Timor Leste, profisional saude, estudante universidade no seluk tan.
(tom)
