DILI, STLTIMORLESTE.com – Dili nuudar oin ba nasaun nian ohin loron hatudu realidade neebe kontraditoriu tebes. Entre povu neebe dudu malu hein mikrolet iha loron manas, no estrutura halte ka parajen bus luxu neebe hamriik mamuk deit, tanba laiha funsaun. Projetu nee kestiona tebes Governu nia prioridade ba dezenvolvimentu ka, ida nee gasta osan povu nian ba monumentu (halte bus) neebe mate.
Orsamentu neebe gasta hodi harii halte sira nee laos kiik. Osan neebe mai husi povu nian no fundu mina rai nian, gasta ona rihun US$ 96.956 hodi sosa besi, simentu no dezain modernu. Objetivu inisial mak atu kria orden iha tranzitu laran. Maibe realidade iha terrenu hatudu katak, katak Governu liu husi Ministeriu relevante parese foka liu ba oin duke fukun.
“Osan gasta rihun US$ 96.956 ba besi no simentu, maibe ema ida la uza, nee laos dezenvolvimentu nee estraga deit osan povu nian,” kestiona Akademista UNTL, Marcos de Araújo ba STL, bainhira hein hela mikrolet iha Bebora, Díli, Tersa (14/04/2026).
Akdemista nee nia lian mak lian husi rihun ba rihun sidadun neebe senti katak, sira nia osan la uza hodi fo duni benefisiu.
Iha parte ketak Observador Ekonomia, José da Silva kestiona kualidade planeamentu husi Ministeriu Relevante. Harii infraestrutura fiziku nee kestaun ida, maibe kria sistema neebe lao mak kestaun seluk. Tanba too ohin loron Ministru Relevante ho Polisia Tranzitu, parese nonok deit hodi haree motorista sira para iha kuaker fatin, maski iha sira nia oin iha parajem neebe dignu.
Tanba laiha regulamentu neebe fiksa no kontrolu neebe rigorozu halte sira nee transforma sai fali fatin soe lixu, monumentu propaganda no risku ba seguransa.
Povu Timor-Leste (TL) tuir nia la presiza Governu ida neebe fase matan deit sidade ho buat neebe haree ba furak, maibe mamuk iha laran. Kada rihun neebe gasta ba projetu infraestrutura, tenke iha rezultadu neebe komunidade bele sente.
“Se halte sira nee kontinua mamuk, nee laos ona dezenvolvimentu maibe nee mak krime ba kofre Estadu, tanba estraga osan saugati deit,”hatete Jose ho lian hirus.
Akademista nee afirna, povu presiza mahon neebe funsiona, laos mahon mamuk neebe hamriik deit hodi sasin ba falhansu jestaun nian. Bainhira ida nee seidauk hadia titlu neebe belit ba infraestrutura sira nee sei kontinua nafatin, projetu arbiru neebe hanehan dignidade finanseiru povu nian.
Entretantu antes nee Governu liu husi Ministeriu Transporte no Komunikasaun (MTK) no Diresaun Nasional Transporte Terestre (DNTT), aloka ona orsamentu hamutuk U$S 96. 956 hodi harii halte ka parajem ba transporte publiku hamutuk 10 iha kapital Dili.
(car)
