BAUKAU, STLTIMORLESTE.com – Irigasaun Ossosege daudaun nee difikulta komunidade agrikultores sira iha Suku Seiçal, Postu Administrativu Baukau Vila, Munisipiu Baukau, tanba kondisaun aat.
Responsavel kanu irigasaun Ossosege, Agostinho Ximenes relata, hafoin akontese udan boot neebe akontese iha fulan Marsu no inisiu fulan Abril nee, rezulta kanu hasan irigasaun Ossosege monu metru ba metru 100 resin, iha neebe daudaun nee labele fornese bee ba natar hektare 100 resin iha Seiçal, neebe pertense ba irigasaun refere.
“Fo impaktu, bee la mai ami labele fukit hare, labele kuda hare, automatikamente bee laiha hare bele mate, viveru nee kuaze 50% metade halo ona metade seidauk,” Agostinho Ximenes hateten ba jornalista sira iha Seiçal, Tersa (14/04/2026).
Nia sublina, husi natar hektare 100 resin balu hahu viveiru ona, hein tempu too atu kutik hodi kuda, maibe daudaun agrikultor sira enfrenta problema menus bee ba natar.
Nia fundamenta, hafoin Irigasaun refere hetan estragus parte agrikultor sira tenta halo normalizasaun ho manual, maibe la konsege rezolve, tanba nee prezisa ekipamentus pezadu.
“Ami ejize ba Governu iha orsamentu ruma karik apoiu ami hadia fali ami nia irigasaun nee para ami hetan fali bee hodi kuda hare, tanba agora hare balu futik ona,” Agostinho Ximenes akresenta.
Liga asuntu nee STL tenta komfirma Diretor Servisu Munisipal Agrikultura Baukau, maibe laiha fatin atu fo komentariu, tanba halao hela servisu balu iha fatin seluk.
(tom)
