BAUKAU, STLTIMORLESTE.com – Agrikultor sira preokupa ba Servisu Munisipal Agrikultura Baukau laiha kombustivel ba fila rai natar, iha Suku Seiçal, Postu Administrativu Baukau Vila, Munisipiu Baukau.
Xefe Aldeia Aldeia Lakoda, Candido Gusmão aprezenta, daudaun nee traktor fila rai gratuita husi Ministeriu Agrikultura Pekuaria, Peskas no Floresta liu husi Servisu Munisipal Agrikultura Baukau hamutuk unidade 7 deskata ona iha Suku Seiçal, objetivu atu apoiu fila fali natar gratuita ba komunidade agrikultor sira iha Suku refere, maibe traktor refere seidauk kobre fila rai iha komunidade balu nia natar, tanba razaun kombustivel.
“Sira neebe iha natar traktor la tama too agora iha 11 pesoas nia total mak 23 hektares seidauk halai, tanba nee hau hakarak aprezenta mina nia traktor paradu too agora, se karik Governu mina laiha para total, labele divizaun ida lao divizaun ida para,” Xefe Aldeia Aldeia Lakoda, Candido Gusmão hateten ba jornalista sira iha Seiçal, Tersa (14/04/2026).
Nia sublina, parte agrikultor sira iha area refere kuaze taka kabubu remata iha fulan liu ba, iha neebe traktor husi Governu fila ona rai iha natar balu, enkuantu natar hektare 23 seidauk.
Nia konsidera, natar hirak neebe too ohin loron parte traktor husi Governu seidauk fila sei fo impaktu ba produsaun, tanba kuda no koilheta la tuir ona tempu produsaun hare nian.
“Asuntu nee hau konfirma sira mina laiha komunidade bele sosa, sira dehan labele, tanba material Governu nian mak komunidade sosa rasik mina sei hasoru sansaun,” Candido Gusmão argumentu.
Iha fatin hanesan, agrikultor Ribeiro mos preokupa asuntu refere, tanba nee husu Governu solusiona problema kombustivel ba agrikultor sira iha Suku Seiçal.
“Nee difikuldade boot ba ami tanba natar seidauk halai, kestaun ami hatoo ba nai ulun sira traktor iha mina laiha, entaun mina mai para fila rai ami hotu hotu sente hanesan ami nia maluk sira halao, agora paradu hela deit hanesan nee ami triste boot,” Ribeiro espresa
Liga asuntu nee STL tenta komfirma Diretor Servisu Munisipal Agrikultura Baukau, maibe laiha fatin atu fo komentariu, tanba halao hela servisu balu iha fatin seluk.
(tom)
