BAUKAU, STLTIMORLESTE.com – Konselhu Munisipal Kombatentes Libertasaun Nasional (CMLN-sigla português) Baukau rejistu ona veteranus nia oan hamutuk nain 60 resin ba programa bolsu estudu tinan 2026 husi Ministeriu Asuntu Kombatentes Libertasaun Nasional (MACLN-sigla português).
Sekretariu Jeral CMCLN Baukau, Roberto Carlos da Costa “Laran Tarido” aprezenta, bolsu estudu refere MACLN inisia husi dekretu lei numeru 8/2009 loron 15 Janeiru, iha neebe fo oportunidade ba veteranus no martire sira nia oan atu asesu bolsu estudu, maibe liu husi submete dokumentus iha edifisiu Konselhu Munisipal Kombatentes Libertasaun Nasional sira iha territoriu Nasional, neebe iha Munisipiu Baukau husi inisiu loron 23 Marsu 2026, maibe tuir planu sei termina iha loron 21 Abril nee.
“Nee planu Ministeriu Kombatentes Libertasaun Nasional fo oportunidade ba liu kombatentes veteranus neebe hahu husi 8a14 ba leten no martire sira deit,” Sekretariu Jeral CMCLN Baukau, Roberto Carlos da Costa “Laran Tarido” hateten ba STL iha knaar fatin Vila Antiga Baukau, Kuarta (15/04/2026).
Nia sublina, bolsu estudu refere prezisa kandidatura sira hahu husi eskola ensinu baziku primeiru siklu too ensinu superior iha rai laran no rai liur, maibe prefere liu ba veteranus no martire oan.
Nia fundamenta, iha prosesu simu dokumentus la limita ba veteranus no martire nia oan sira, maibe sei prioridade deit ba veteranus no martire oan nain 50, tanba kriteira husi Ministeriu mak orienta.
“Kriteira ida nee katak fo ba oan neebe durante nee hetan valor diak hodi kontinua sira nia estudu,” Laran Tarido akresenta.
Nia dekalara, kandidatura neebe iha bainhira liu selesaun no asesu ba bolsu estudu refere kada tinan Ministeriu sei sustenta ho valor orsamentu la hanesan, iha neebe benefisiariu sira neebe tuur iha banku eskola ensinu superior sei hetan US$ 1.000, maibe tenke fo valor neebe boot tuir kriteira husi Ministeriu.
Tanba, bainhira benefisiariu ida hetan tiha direitu iha bolsu estudu refere, maibe iha tinan 2027 haree valor menus no la tuir kriteira neebe iha, sei lakon direitu iha bolsu estudu refere.
“Ita husu katak iha tempu ida nee sira aproveita ho valor neebe aas sira kontinua hetan subsidiu,” Laran Tarido enkoraja.
Sekretariu Jeral CMCLN Baukau nee konsidera, politika Ministeriu Asuntu Kombatentes Libertasaun Nasional fo oportunidade ba veteranus no martire oan atu asesu bolsu estudu refere, tanba reflete ba istoria pasadu, neebe veteranus no martire sira fo ona sira nia tempu kontribui prosesu luta libertasaun nasional durante tinan naruk iha ai laran.
Nunee iha faze ukun aan fo oportunidade ba sira nia oan asesu iha bolsu estudu hodi kapasita aan kontribui iha prosesu dezenvolvimentu nasional nomos fo asistensia saude ba veteranus no kombatentes sira neebe sei moris.
(tom)
