DILI, STLTIMORLESTE.com – Tribunal Judisial Primeira Instansia Dili (TJPID) liu husi prosesu primeiru interogatoriu, hatun despaxu hodi aplika medida koasaun Prizaun Preventiva ba arguidu inisial AdCA.
Arguidu lori mai iha Tribunal, no husi parte Ministeriu Publiku (MP) promove arguidu ho krime abuzu seksual ba menor.
Tribunal halo tiha identifikasaun no rona tiha deklarasaun arguidu nian, Tribunal deside hodi tama ba alegasaun husi Ministeriu Publiku no parte Defeza nia.
Nunee iha alegasaun Ministeriu Publiku nian liu husi Prokurador, Antonio Tavares husu Tribunal atu aplika medida koasaun Prizaun Preventiva ba arguidu, tanba konsidera iha indisus forte.
No parte Defeza arguidu nian Defensor Publiku, José Maria Guterres husu Tribunal tetu tuir konviksaun Tribunal nian atu deside.
Ikus mai Juiz turnu Ana Paula Fonseca hasai despaisu, hodi aplika medida koasaun Prizaun Preventiva ba arguidu, hodi asegura arguidu ba iha prosesu investigasaun.
Hafoin desizaun, tuir defeza arguidu nian José Maria Guterres katak, iha alegasaun defeza husu Tribunal atu tetu tuir konviksaun Tribunal nian, tanba arguidu komete ona kazu rua hanesan.
Maibe ikus mai Juiz deside aplika medida Prizaun Preventva ba iha arguidu.
Prosesu nee prezide husi Juiza turnu, Ana Paula Fonseca, Ministeriu Publiku reprezenta husi Prokurador, Antonio Tavares, arguidu hetan asistensia legal husi Defensor Públiku José Maria Guterres.
Tuir kronolojia katak, kazu nee akontese iha loron 12 fulan Abril, iha Aileu, tuku 1:00 meudia no komunidade sira duni tuir arguidu kaer iha tuku 5:00 dader, hodi entrega ba autoridade Polisia Nasional Timor Leste iha Munisipiu Aileu.
(ter)
