DILI, STLTIMORLESTE.com – Tribunal Judisial Primeira Instansia Dili (TJPID) julga arguidu nain 4 inisial RAP, NRRY, IV no LGG ba krime Furtu Agravadu hasoru lezada inisial IM hanesan nain ba loja 668 iha Taibesi.
Tuir faktus katak, iha loron 26 fulan Dezembru tinan 2023, iha oras 03h00, Madrugada iha Taibesi Dili, (Loja 668) momentu neeba arguidu sira desloka ba fatin ka Loja refere hodi naok.
Bainhira arguidu sira to fatin refere (Loja 668), arguidu LGG ho arguidu IV maka tama ba Loja refere hodi selok gaveta tau osan, hafoin arguidu RAP ho arguidu NRRY hein iha liur hodi hare ema ruma atu mai karik.
Bainhira arguidu sira naok ka foti tiha lezada nia osan ho sasan sira, ho nunee arguidu sira mos halai sai fali husi fatin, ho osan neebe maka arguidu sira naok iha tempu kalan neeba. Sasan ka osan neebe maka arguidu sira naok maka hanesan, osan tahan hamutuk $. 600,00 USD, osan besi ho valor US$ 100,00 Kuluna ida ho folin US$ 60,00, Sinelos ho marka Sando ho valor US$ 21,00.
Bainhira arguidu sira naok tiha osan ho sasan sira nee, hafoin arguidu sira desloka ba Ponte My Friend, ho nunee maka arguidu LGG maka fahe osan refere e kada arguidu ida hetan osan ho valor US$ 50,00.
Depois de inkeritu, arguidu sira mos ho volontariu entrega fali ona osan balun neebe maka sira naok iha momentu neeba.
Konsekuensia direta husi arguidu sira nia konduta nee, halo lezada hetan prejuizu iha momento neeba, ho valor osan US$ 781,00.
Arguidu sira, halo ho forma livre, deliberada no konsiente, hatene momos (ben sabendo) katak, tama iha ema nia loja (iha kalan) hafoin selok odamatan no gaveta hodi foti ema seluk nia sasan ka osan neebe maka laos pertensia ba sira nian, kontra vontade lezada nian e foti osan no sasan refere sem konhesimentu husi lezada.
Arguidu sira mos hatene hela katak, hahalok sira nee, proibidu tuir lei penal.
Tanba nee, arguidu sira komete krime ida, Furtu Agravadu previstu tuir artigu 252 husi Kodigu Penal.
Hatan ba faktus nee arguidu RAP deklara katak, osan neebe nia simu hamutuk 30 dolar, no osan sira nee sira foti tiha lori ba fahe iha ponte My Frend.
Arguidu deklara, konaba osan foti total hira arguidu la iha konesementu, maibe osan neebe foti fo ba arguidu 30 dolar nee arguidu devolve fila ona.
Arguidu arepende tebes ba nia hahalok nee, promete sei la halo tan iha futuru.
Arguidu NRRY deklara katak, faktus neebe iha loos hotu, maibe konaba osan foti montante hira arguidu la iha konesementu.
Arguidu deklara, osan neebe fahe sira fo ba arguidu 39 dolar, maibe arguidu fo fila ona. Arguidu arepende tebes ba nia hahalok nee.
Arguidu IV deklara katak, sira foti duni osan, konaba sinelus no koluna sira foti hotu, maibe lori tiha sai mai tau iha loja oin, depois kareta ida lino nia lampu kona ba sir, halo sira tauk hodi halai no soe hela sinelus no koluna nee iha loja oin.
Arguidu deklara, osan neebe LGG foti fo 50 dolar ba arguidu, no osan foti falun ba iha ropa deit. Osan neebe foti devolve ona, arguidu mos arepende los ba hahalok nee.
Arguidu LGG deklara katak, faktus neebe iha los hotu, maibe konaba osan neebe foti hamutuk 250. Arepende tebes ba nia hahalok nee.
Lezada IM deklara katak, momentu arguidu sira tama ba iha loja laran hodi foti sasan nee, lezada iha loja laran. Primeiru arguidu sira tama lezada la hatene ida, depois lezada rona odamatan tarutu maka lezada mos hader hodi duni arguidu sira.
Lezada deklara, arguidu sira foti osan tahan hamutuk 60, osan besi 100, koluna ida nia folin 60, ho sinelus neen ho folin 21 dolar. Lezada deklara, perdua arguidu sira, maibe husu atu iha futuru sira labele halo tan.
Rona tiha arguidu no lezada sira, ikus mai Tribunal deside hodi tama ba iha faze alegasaun.
Iha alegasaun nee, Prokurador Hernani Rangel deklara katak, arguidu sira tau hanoin hamutuk hodi ba naok, prense elementu ba krime neebe iha, tanba naok ema nia sasan iha tempu kalan.
MP husu Tribunal aplika pena prizaun tinan rua, suspende ba tinan rua.
Aleinde nee, Defeza husi arguidu sira nian husu Tribunal atu aplika pena suspensaun ba arguidu sira.
Roa tiha alegasaun, Tribunal adia ba loron 15 fulan Maio tuku 5 loraik hodi rona desizaun.
Audensia julgamentu nee, prezide husi Juiz Kolektivu, Jumiati Freitas, Jose Gonsalves, Juiz estajiadu nain ida, Ministeriu Publiku reprezenta husi Prokurador Hernani Rangel, arguidu hetan asistensia legal husi Defensor Publiku Manuel Amaral.
(ter)
